ABŞ-ın yeni dövlət katibi erməniləri məyus etdi

  24 May 2018    Oxunub : 3330
ABŞ-ın yeni dövlət katibi erməniləri məyus etdi
ABŞ Konqresinin xarici əlaqələr üzrə komitəsində ermənipərəst konqresmenlər qondarma "erməni soyqırımı" məsələsini müzakirəyə çıxarıblar.
AzVision.az xarici KİV-ə istinadən xəbər verir ki, ötən gün komitədə ABŞ Dövlət Departamentinin büdcəsi, əməliyyatları və xarici siyasət istiqamətindəki prioritetləri üzrə dinləmələrdə konqresmenlər David Sisillin və Bred Şerman dövlət katibi Mayk Pompeoya belə bir təzyiqedici sual ünvanlayıblar:

"ABŞ dövlət katibi olaraq, sizdən əvvəlki bir çox dövlət katiblərinin etmədiyini edərək, Birinci Dünya Müharibəsində Osmanlı imperiyasının erməni vətəndaşlarına qarşı törətdiyi soyqırımı tanıyacaqsınızmı? Hə, ya yox?"

Pompeonun cavabı isə belə olub: "Bu suala cavab verə bilməyəcəyəm. Mən cavabı bilmirəm. Bu məsələyə baxacağam".

Cavabla qane olmayan ermənipərəst konqresmen, xarici əlaqələr komitəsinin Respublikaçı üzvü Bred Şerman Pompeoya bir növ ultimatum verib. "Mən ümid edirəm ki, ABŞ Dövlət Departamenti "erməni soyqırımı" məsələsində heç olmasa ən azı neytral qalacaq. Konqres isə "erməni soyqırımı" məsələsini həll edəcək", -deyə Şerman vurğulayıb.

Qeyd edək ki, ABŞ prezidenti Donald Tramp da ermənilərin gözləntilərinin əksinə olaraq, bu il aprelin 24-də "erməni soyqırımı" ifadəsini işlətməyib. Əvəzində Tramp, ermənilərin Osmanlı imperiyasından deportasiya edildiyini bildirib.

Leyla Elbrusqızı
AzVision.az

Teqlər: ABŞ   soyqırım   Tramp   Konqress