Rusiyanın nüfuzlu KİV-lərinə sanksiya tətbiq edildi

  24 May 2018    Oxunub : 430
Rusiyanın nüfuzlu KİV-lərinə sanksiya tətbiq edildi
Rusiyanın “Rossiya seqodnya” və “RİA Novosti” informasiya agentlikləri Kiyevin sanksiya siyahısına salınıb. Hazırda Ukrayna ərazisində hər iki xəbər saytına giriş bloklanıb.
AzVision.az xəbər verir ki, bu barədə məlumat Ukrayna prezidenti Pyotr Poroşenkonun rəsmi saytında yerləşdirilib.

“Rossiya seqodnya” beynəlxalq informasiya agentliyinin baş direktoru Dmitri Kiselyov Rusiya xəbər agentliklərinə qarşı sanksiyaları pisləyərək, bunu Ukraynadakı rejimin gücsüzlüyünün göstəricisi hesab edib. Rusiya Dövlət Duması isə Kiyevin bu addımını senzura aktı adlandıraraq, beynəlxalq təşkilatlara şikayət edəcəklərini bildirib.

Qeyd edək ki, bundan əvvəl Ukrayna Təhlükəsizlik Xidmətinin (UTX) əməkdaşları Rusiyanın “RİA Novosti” beynəlxalq informasiya agentliyinin Ukraynadakı ofisinə basqın edərək, istintaq-axtarış əməliyyatı keçiriblər. Həmçinin, "RİA Novosti" Ukraynanın rəhbəri, jurnalist Kirill Vışinskoy yaşadığı evinin yanında həbs olunub. Rusiyalı jurnalist Donbassdakı silahlı rejimin fəaliyyətini fəal şəkildə təbliğ etməklə, Ukrayna Cinayət Məcəlləsinin 111-ci maddəsi ilə - dövlətə xəyanətdə ittiham olunub.

UTX-nin mətbuat katibi Yelena Qitlyansko hesab edir ki, Rusiya Federasiyasının nəzarətində olan media qurumları "təcavüzkar" dövlət tərəfindən Ukraynaya qarşı həyata keçirilən hibrid informasiya müharibəsində istifadə olunur.

Leyla Elbrusqızı
AzVision.az

Teqlər: Ukrayna   sanksiya   senzura   Rusiya   RİANovosti