Azvsison.az musavat.com-a istinadən xəbər verir ki, Açıq Cəmiyyət Partiyasının lideri, eks-spiker Rəsul Quliyev Milli Şuranın hər mitinqindən, toplantısından, verdiyi yeni qərardan sonra öz fikirlərini bildirdiyi kimi 12 oktyabrda keçirilən mitinqdən sonra da susmadı. Milli Şuranın vahid namizəd olaraq Cəmil Həsənlini seçdikdən sonra qurumun fəaliyyətini bir dəfə də olsun müsbət qiymətləndirməyən R.Quliyev müxalifəti yenə də “sancıb”. R.Quliyev Milli Şuranın oktyabrın 12-də keçirilən mitinqindən sonra hakimiyyətə etiraz edən müxalifət üçün hər şeyin bitdiyini deyir. Bu barədə öz facebook səhifəsində yazan eks-spiker 12 oktyabr mitinqinin düzgün strategiyası olmayan müxalifət üçün final olduğunu yazıb: “12 oktyabr mitinqi ilə düzgün strategiyası olmayan müxalifətin final akkordları çalındı. 12 oktyabr mitinqinin indiyə qədər keçirilən mitinqlərdən 20 faizə yaxın çoxsaylı olması ürəkaçan faktordur, ancaq heç bir dəyişiklik etməyə kifayət deyildir”.

Qeyd edək ki, bu, artıq ən azı həftədə bir dəfə təkrar olunan vəziyyətdir-Milli Şura, oradakı qüvvələr Milli Şuranın üzvü Rəsul Quliyev tərəfindən ittiham olunur, aşağılanır. Milli Şuradakı qüvvələrin buna dözümü, heç bir tədbir görməməsi isə heyrət doğurur. Milli Şura, əsasən də seçki kampaniyasının ağırlığını üzərinə götürmüş partiyalar Rəsul Quliyevin bu qədər ittihamlarına niyə dözürlər?

Müsavat Divanın üzvü Tural Abbaslı bildirdi ki, Rəsul Quliyev Cəmil Həsənlinin seçki kampaniyasının gedişində olduğu kimi, seçkidən sonra da hakimiyyətin xoşuna gəlməyə və Azərbaycana qayıdışına yaşıl işıq yandırılmasına nail olmağa hesablanan çıxışlar edir: “Bu adamın bütün fəaliyyəti Milli Şuranın tənqid və təhqir etməkdir. Mən hesab edirəm ki, ona dözdüyümüz yetər Milli Şuranın növbəti sessiyasında Rəsul Quliyevin qurumdan xaric edilməsi məsələsi qoyulmalıdır. Milli Şuraya heç bir köməyi dəyməyən, əksinə Milli Şuraya qarşı təbliğat aparan şəxsin orada saxlanması cəmiyyətdə də haqlı suallar yaradır”.