İran xarici işlər naziri Cavad Zərifin də iştirak etdiyi “beşlik” ölkələrinin Vyana sammitində moderatorluq edən Avropa İttifaqının xarici siyasət və təhlükəsizlik məsələləri üzrə ali nümayəndəsi Federika Mogerini bildirib ki, qəbul edilən yekun bəyannamədə nüvə sazişinin hazırkı iştirakçıları ABŞ sanksiyaları qarşısında İranın ziyan görməyəcəyilə bağlı verdikləri öhdəliklərə, həmçinin nüvə sazişinin icrasına sadiq olduqlarını təsdiqləyiblər.

Qeyd edək ki, İran prezidenti Həsən Ruhani Avropa ölkələrinin sadəcə ümumi sözlərlə vəd verdiyini və təqdim edilən zəmanət paketində nüvə sazişi üzrə əməkdaşlığın davam etdirilməsi üçün konkret yol xəritəsinin olmadığını bildirib. Ruhani vurğulayıb ki, əgər işlər bu şəkildə davam edərsə, Avropa İttifaqı ilə aparılan nüvə danışıqları yaxın zamanda dayandırılacaq və Tehran da nüvə razılaşmasından çıxacaq.

Sammitdən əvvəl Fransa xarici işlər naziri bəyan etmişdi ki, Avropa ölkələri çətin ki, noyabradək İranla olan nüvə sazişini xilas etmək üçün iqtisadi həll paketi hazırlasınlar. O həmçinin, Tehranı nüvə sazişindən çıxacaqlarilə bağlı təhdidlərinə son qoymağa çağırıb.


Leyla Elbrusqızı
AzVision.az