"Almaniya Rusiyanın girovuna çevrilib" - Tramp

"Almaniya Rusiyanın girovuna çevrilib" - Tramp
  11 İyul 2018    Oxunub:2910
ABŞ prezidenti Donald Tramp hesab edir ki, Moskva ilə energetika sahəsində, xüsusən də “Şimal-axını 2” qaz boru kəmərinin tikintisinə dair imzalanan müqavilələr Almaniyanı Rusiyanın girovuna çevirib.
AzVision.az xəbər verir ki, bu barədə Tramp NATO baş katibi Yens Stoltenberqlə keçirdiyi görüşdə deyib.

“Düşünürəm ki, Almaniya Rusiyanın girovudur. Çünki Almaniya Rusiyadan çox böyük miqdarda enerji alır”, – deyə Tramp vurğulayıb.

Almaniyanın İqtisadiyyat Nazirliyi bir müddət əvvəl bəyan etmişdi ki, “Şimal-axını 2” layihəsinə görə sanksiyalar tətbiq etməyəcəyinə dair Vaşinqton Berlinə zəmanət verib.

Qeyd edək ki, Tramp NATO ölkələri dövlət başçılarının bugünkü sammitində iştirak etmək üçün Belçikanın paytaxtı Brüsseldədir.



Xatırladaq ki, 1220 kilometr uzunluğundakı “Şimal axını-2” qaz boru kəməri Baltik dənizindən keçməklə Rusiyadan Almaniyaya ildə 55 milyard kubmetr qaz nəql etmək gücünə malik olacaq. Rusiyanın enerji nəhəngi “Qazprom” bəyan edib ki, “Şimal axını-2” layihəsi 2019-cu ilin sonunadək başa çatdırılacaq.

Baltikyanı ölkələr, Polşa və Ukrayna “Şimal axını-2” qaz boru kəmərinin tikintisinə qarşı çıxırlar. Bu ölkələr hesab edirlər ki, “Şimal axını-2” iqtisadi layihə deyil və Avropanın bütövlüyünə zərbə vurmağa hesablanıb. ABŞ da Almaniyanın Rusiya ilə "Şimal axını-2" qaz razılaşmasını imzalamasına qəti etiraz edir və iddia edir ki, bununla Avropanın Rusiyadan qaz asılılığı daha da artacaq. Vaşinqton ehtiyat edir ki, "Şimal axını-2" qaz kəmərinin təhlükəsizliyini bəhanə edərək, Moskva gələcəkdə Baltik dənizindəki hərbi mövcudluğunu gücləndirəcək.

Leyla Elbrusqızı
AzVision.az


Teqlər: ABŞ   Rusiya   Almaniya   “Şimalaxını-2”  





Xəbər lenti