AzVision.az xəbər verir ki, Orteqa bu barədə “Euronews” telekanalına müsahibəsində deyib.

“Biz Nikaraquaya bir neçə dəfə silahlı müdaxilə edən ABŞ kimi güclü düşmənlə üzləşmişik və onlar Nikaraquanın daxili işlərinə qarışmağa davam edirlər. Onlar bir neçə yolla - ABŞ Beynəlxalq İnkişaf Agentliyi (USAID) və digər Amerika təşkilatlarının vasitəsilə guya özlərinin dediyi kimi, Nikaraquda demokratiya üçün milyonlar elan edirlər. Lakin ayrılan həmin pullar başqa ehtiyac və məqsədlərə - Nikaraquanın destabilizasiyasına, 2007-ci ildə biz yenidən hakimiyyətə gələndən sonra cinayətlər törədən silahlı qruplaşmaların fəaliyətinin stimullaşdırılmasına və ölkədə şiddətə təhrikə xərclənir.” - deyə Orteqa vurğulayıb.

20 iyulda USAID Nikaraquada demokratiya və insan haqqlarının dəstəklənməsi üçün əlavə olaraq daha 1,5 milyon dollar ayırdığını bəyan edib. Bir sıra dövlətlər USAID-i ABŞ-ın Mərkəzi Kəşfiyyat İdarəsinin tapşırıqlarını yerinə yetirməkdə ittiham edərək öz ərazilərində təşkilatın fəaliyyətinə qadağa qoyublar.

Qeyd edək ki, aprel ayından etibarən Mərkəzi Amerikada yerləşən Nikaraquada hökumət əleyhinə etirazlar keçirilir. Səbəb isə işəgötürənlər və işçilərin sosial sığorta fondlarına ayırdıqları məbləğin artırlmasına dair hökumətin islahat planıdır. Prezident Orteqa artıq bu planı ləğv edib. Lakin buna baxmayaraq, ölkədə etirazlar dayanmayıb. Apreldən etibarən Nikaraquadakı hökumət əleyhinə etirazlarda ölənlərin sayı 448-ə çatıb. Orteqa müxalifətin tələbilə növbədənkənar seçkilər keçirməkdən imtina edir və baş verənləri təxribat adlandırır.

Leyla Elbrusqızı
AzVision.az