AzVision.az “Reuters”ə istinadən xəbər verir ki, danışıqlar zamanı Ruhani Şimali Koreyanın İranla bir çox oxşar cəhətlərinin və əksər beynəlxalq məsələlərə orta baxışlarının olduğunu qeyd edib. Bu baxımdan, Donald Trampla Kim Çen Inın görüşünü xatırladan Ruhani öz ölkəsinin nümunəsində Şimali Koreyaya Vaşinqtonla ehtiyatlı olmağı məsləhət görüb.

“ABŞ administrasiyasının son illərdəki davranışları bütün dünyada Amerikanın öz üzərinə götürdüyü öhdəlikləri yerinə yetirməyən etibarsız və güvənilməz bir ölkə hesab edilməsilə nəticələnib. İndiki vəziyyətdə dost ölkələr öz münasibətlərini və beynəlxalq ictimai əməkdaşlığı inkişaf etdirməlidirlər.” – deyə, Ruhani bildirib.

Şimali Koreya xarici işlər naziri Ri Yonq Ho isə öz növbəsində Vaşinqtonun İranın nüvə proqramı üzrə 2015-ci il sazişindən birtərəfli qaydada çıxması və Tehrana qarşı sanksiyaları bərpa etməsinin beynəlxalq hüquq və qaydalara zidd olduğunu bəyan edib. Həmçinin vurğulayıb ki, ABŞ sanksiyalarına baxmayaraq, İran islam respublikası ilə əlaqələrin dərinləşdirilməsi və bununla da beynəlxalq münasibətlərdə birtərəfliyə qarşı çıxmaq Pxenyanın xarici siyasətinin strateji hədəflərindəndir.

Leyla Elbrusqızı
AzVision.az