Moskva təsdiqlədi - ABŞ Suriyanı vurmağa hazırlaşır
Konaşenkovun fikrincə, ABŞ rəsmilərinin Bəşər Əsəd hökuməti kimyəvi silah tətbiq edərsə, ən qəti şəkildə cavab verərək Suriyaya hücum həyata keçirəcəkləri barədə bəyanatları əsassızdır.
“Bununla da, Qərb dövlətlərinin ictimai bəyanatlarına zidd olan hərəkətləri Yaxın Şərq ölkəsində vəziyyətin kəskinləşməsinə və Suriya ərazisində sülh prosesinin pozulmasına istiqamətlənib”, - deyə Rusiya Müdafiə Nazirliyinin rəsmisi bildirib.
Konaşenkov vurğulayıb ki, Suriyada kimyəvi silah təxribatına “Həyat Təhrir Əş-Şam” (“Cəbhət Ən-Nüsrə”) terror qruplaşması və “Bəyaz Dəbilqəlilər” hazırlaşırlar. Onlar kimyəvi hücumu Əsəd hökumətinin üzərinə atmaq üçün Cisr Əş-Şuhur şəhərinə xlor konteynerləri gətirərək daha sonra onları Hallyuz kəndinə aparıblar. “Bəyaz Dəbilqəlilər”in Britaniyanın “Oliva” xüsusi hərbi şirkətinin mütəxəssisləri tərəfindən təlim keçən silahlıları isə kimyəvi silahdan zərər çəkənlərin xilas olunmasını imitasiya edəcəklər.
Qeyd edək ki, ABŞ prezidentinin milli təhlükəsizlik məsələləri üzrə köməkçisi Con Bolton Cenevrədə Rusiya Təhlükəsizlik Şurasının katibi Nikolay Patruşevlə görüşündə əgər Bəşər Əsəd hökuməti Suriyada kimyəvi silah tətbiq edərsə, Vaşinqtonun yenidən Suriyaya zərbə endirəcəyi ilə bağlı Moskvaya xəbərdarlıq edib.
Leyla Elbrusqızı
AzVision.az