AMEA prezidentinin müşaviri Rəhim Hüseynov AMEA RH Mərkəzi Aparatının “İnnovasiya” şöbəsinin rəisi vəzifəsinə təyin edilib. AzVision.az-a bu haqda AMEA-nın mətbuat xidmətindən məlumat verilib.

Bildirilib ki, bu haqda qərar AMEA Rəyasət Heyətinin iclasında qəbul olunub.

Qeyd edək ki, Rəhim Hüseyn oğlu Hüseynov 1961-ci il iyulun 22-də Bakı şəhərində anadan olub.1978-1983-cü illərdə Azərbaycan Neft və Kimya İnstitutunun “Mühəndis-iqtisad” fakültəsində təhsil alıb. 1991-92-ci illərdə İstanbul Dövlət Universitetində “İdarəetmə” fakültəsində magistr pilləsi üzrə təhsilini davam etdirib.

AMEA Kibernetika İnstitutunun nəzdində yaradılmış Avtomatlaşdırılmış idarəetmə sistemləri şöbəsində mühəndis, böyük mühəndis, böyük iqtisadçı, I dərəcəli iqtisadçı vəzifələrində çalışıb. “SİAR” şirkətində təsisçilərdən biri və baş menecer, “Marketinq mütəxəssisləri” İctimai Birliyində idarə heyətinin sədri, Azərbaycan Respublikası İqtisadi İnkişaf Nazirliyinin İqtisadi İslahatlar Mərkəzi və nazirliyin Antiinhisar Siyasəti Departamentinin direktoru, AR İqtisadi İnkişaf Nazirliyi yanında Azərbaycanda İxracın və İnvestisiyaların Təşviqi Fondunun prezidenti və Azərbaycan Respublikasının Prezidenti yanında Elmin İnkişafı Fondunun müşaviri olub. Hazırda Azərbaycan Milli Elmlər Akademiyasının Rəyasət Heyətində prezidentin müşaviri vəzifəsini icra edir.

1996-2013-cü illər ərzində bir çox beynəlxalq və yerli konfrans, seminar, treninqlərdə iştirak edib. 1997-1998-ci illərdə BMT Sənayenin İnkişafı Təşkilatında (UNİDO) Azərbaycan üzrə milli ekspert kimi fəaliyyət göstərib. 1997–2002-ci illərdə Avropa İctimai Rəy və Marketinq Araşdırmaları Cəmiyyətinin (ESOMAR) üzvü, 2000-2002-ci illərdə Böyük Britaniya Marketinq Akademiyasının və Amerika Marketinq Assosiasiyasının Himayəçilər Şurasının üzvü olub. 2003-2005-ci illərdə Beynəlxalq İqtisadi Əməkdaşlıq Təşkilatının (ECO) Regional Planlaşdırma Şurasında təşkil olunan iclaslarda ölkəmizin rəsmi nümayəndə heyətinə rəhbərlik edib. 2005-ci ildən bu günə qədər Dünya İqtisadi Forumunun Azərbaycanda tədqiqatlar üzrə tərəfdaşı, 2006-cı ildən Ümumdünya Ticarət Təşkilatı Beynəlxalq Ticarət Mərkəzinin Azərbaycanda rəsmi tərəfdaş Qrupunun rəhbəri, Azərbaycan Kənd Təsərrüfatına Yardım Layihəsi üzrə Milli ekspertlər Komissiyasının üzvüdür.