Akif Muradverdiyevin işi məhkəməyə göndərildi

  28 Oktyabr 2013    Oxunub : 585
Akif Muradverdiyevin işi məhkəməyə göndərildi
Prezident Aparatının keçmiş işlər idarəsinin müdiri Akif Muradverdiyevin barəsində olan cinayət işi üzrə ibtidai istintaq yekunlaşıb.

A. Muradverdiyevin vəkili Rəşad Mirmehdizadənin verdiyi məlumata görə, cinayət işi üzrə materiallarla tərəflər tanış olub və ittiham aktı təsdiqlənərək baxılmaq üçün Xəzər Rayon Məhkəməsinə göndərilib.

Hüquq-mühafizə orqanlarının yaydığı məlumata görə, A. Muradverdiyev 2013-cü il iyunun 20-də saat 09:25 dəqiqədə Heydər Əliyev Beynəlxalq Hava Limanından Rusiya Federasiyasına aparmaq məqsədilə külli miqdarda dəyəri olan Çar Rusiyasına aid qədim qızıl pul sikkələrini qaçaqmalçılıq yolu ilə, yəni Azərbaycan Respublikasının gömrük sərhədindən gizli yolla gömrük nəzarətindən keçirib. O, Bakı-Moskva aviareysi ilə Rusiyaya uçmaq üçün Azərbaycan Respublikasının gömrük sərhədindən gömrük nəzarətindən keçdikdən dərhal sonra Milli Təhlükəsizlik Nazirliyinin əməkdaşları tərəfindən saxlanılıb. Qanunvericiliklə müəyyən edilmiş qaydada hal şahidlərinin iştirakları ilə keçirilən baxış zamanı onun əlində olan çantasından külli miqdarda dəyəri olan - Çar Rusiyasına aid 40 ədəd qədim qızıl pul sikkələri aşkar edilərək götürülüb.

Faktla bağlı Milli Təhlükəsizlik Nazirliyi İstintaq Baş İdarəsi tərəfindən Azərbaycan Respublikası CM-nin 206.1-ci (qaçaqmalçılıq) maddəsi ilə cinayət işi başlanıb. Akif Muradverdiyev təqsirləndirilən şəxs qismində cəlb olunaraq məhkəmənin qərarı ilə barəsində həbs-qətimkan tədbiri seçilib. (apa)

Teqlər: