Azvision.az Almaniyanın “MDR Thüringen” radio agentliyinə istinadən xəbər verir ki, alman polisinin saxladığı şübhəlilər 31 yaşlı avtomobil daşıyıcısı Z.Artur və 26 yaşlı S.Karodur (istintaqın məxfiliyi ilə əlaqədar adlar şərti göstərilib). Belə ki, polis əməkdaşlarının apardığı reydlər zamanı 35 kiloqram marixuana aşkarlanıb.

Qeyd olunur ki, həbs edilən ermənilər 10 il əvvəl yaradılan və reketlik, qarət və narkotiklərin qanunsuz dövriyyəsi ilə məşğul olan “Coker” qruplaşmasının liderlərindən birinin davamçıları hesab olunurlar.

Daha sonra “Coker” qruplaşması dağılsa da, Z.Artur və S.Karo cinayətkar fəaliyyətlərini davam etdiriblər. Onlar 2014-cü ilin iyulunda Erfurt şəhərində erməni klanları arasındakı silahlı atışmanın iştirakçısı olublar. Atışmanın baş verdiyi binanın yaxınlığındakı müşahidə kameralarının video yazılarında Z.Artur və S.Karonun insident ərazisində olduqları açıq şəkildə görünür. Z.Artur həmçinin, 2016-cı ilin iyununda Erfurtdakı gecə klubunda erməni və moldovalı klanlar arasındakı qarşıdurma videolarında da görünüb.

“MDR Thüringen” bildirir ki, alman müstəntiqləri uzun müddət erməni mafiyasının narkotik ticarəti ilə əlaqəsini üzə çıxarmağa cəhd ediblər, lakin onların kifayət qədər dəlilləri olmayıb. İndi isə onların əlində müəyyən ipucları var. Bu mənada, erməni mafiyasının 2 üzvünü həbs edən müstəntiqlərdən biri bildirib ki, “bu cür həbslər mafia qruplaşmalarında, xüsusən də mafiya bosslarında ciddi narahatlığa səbəb olub. Çünki onlar növbəti istintaqdan və müvafiq olaraq, başlarına gələcək bəladan qorxmalıdırlar.”

Xatırladaq ki, bundan əvvəl Almaniyanın nüfuzlu “Der Spiegel” jurnalı “Mitteldeutscher Rundfunk” radiosu ilə ortaq araşdırma apararaq erməni mafiyasının cinayətlərindən bəhs edən böyük məqalə hazırlamışdı. Araşdırmalarda Almaniyanın Federal Cinayət Polisinin erməni mafiyasına qarşı mübarizə ilə bağlı məxfi məruzəsinə istinad edilib. Aydın olub ki, Federal Cinayət Polisi 6 əyalətin müvafiq ixtisaslaşmış qurumları ilə birgə 4 il ərzində “Fight against thieves in law” (“Qanuni oğrulara qarşı mübarizə”) kod adı altında erməni mafiyasına qarşı məxfi əməliyyatlar keçirib. Federal Cinayət Polisinin məxfi məruzəsində qeyd olunub ki, “Küllü miqdarda maliyyə resurslarına sahib erməni mafiyası Almaniyadakı hüquqi dövlətin əsaslarını təhdid edir.”

Araşdırma nəticəsində hətta məlum olub ki, erməni mafiya şəbəkəsinin əlaqələri diplomatik dairələrədək gedib çatır. Bu səbəbdən də, Ermənistanın Almaniyadakı hazırkı səfiri - vaxtilə beynəlxalq qaçaqmalçılıq fəaliyyətilə məşğul olmaqda şübhəli bilinən Aşot Smbatyan erməni mafiyasına qarşı mübarizədə rəsmi Berlinə öz köməyini təklif etsə də, Federal Cinayət Polisi bu əməkdaşlıqdan imtina edilməsini məsləhət görüb. Çünki Almaniya polisi istisna etməyib ki, erməni “qanuni oğrular” Ermənistanın dövlət strukturları və onların nümayəndələri ilə əlaqələrə malikdir.

Leyla Elbrusqızı
Azvision.az