Baş nazir şahzadə ilə görüşmək istəyir - Kaşoqi cinayəti

  30 Noyabr 2018    Oxunub : 3987
Baş nazir şahzadə ilə görüşmək istəyir - Kaşoqi cinayəti
Böyük Britaniyanın baş naziri Tereza Mey Argentinanın paytaxtı Buenos-Ayresdə bu gündən başlayaraq dekabrın 1-dək davam edəcək “G20” (“Böyük iyirmilik”) sammiti çərçivəsində Səudiyyə Ərəbistanının vəliəhd şahzadəsi Məhəmməd bin Salmanla təkbətək görüş keçirəcək.
Azvision.az “Reuters”ə istinadən xəbər verir ki, bu barədə Britaniya baş nazirinin mətbuat katibi məlumat yayıb.

Argentinaya yola düşməzdən əvvəl Mey hava limanında jurnalistlərə bildirib ki, Səudiyyənin vəliəhd şahzadəsi ilə jurnalist Camal Kaşoqinin qətlini və Yəməndəki vəziyyəti müzakirə etmək istəyir.

Qeyd edək ki, G20 sammitində iştirak 6 həftə əvvəl səudiyyəli müxalif jurnalist Camal Kaşoqinin Səudiyyə Ərəbistanının İstanbuldakı baş konsulluğunda amansızcasına qətlinə əmr verdiyi iddia edilən Məhəmməd bin Salmanın bu cinayətdən sonra regiondan kənar ilk səfəridir. Sammit çərçivəsində vəliəhdin Rusiya prezidenti Vladimir Putinlə görüşərək dünya neft bazarındakı vəziyyəti müzakirə edəcəkləri planlaşdırılır.

Leyla Elbrusqızı
Azvision.az

Teqlər: Səudiyyə   Argentina   Britaniya   G20