ABŞ Suriyadakı qoşunlarını İraq Kürdüstanına yerləşdirir

ABŞ Suriyadakı qoşunlarını İraq Kürdüstanına yerləşdirir
  02 Yanvar 2019    Oxunub:4946
ABŞ prezidenti Donald Trampın təlimatına uyğun olaraq Suriyadan çıxarılacaq Amerika qoşunları İraqın şimalındakı Kürd Muxtariyyətinin paytaxtı Ərbildəki Harir ABŞ aviabazasına göndəriləcək.
Azvision.az xəbər verir ki, bu barədə İraq Müştərək Əməliyyatlar Komandanlığının mətbuat katibi, general-mayor Yəhya Rəsul bəyan edib. Lakin o, Ərbilə göndəriləcək amerikalı hərbçilərin oranı nə zaman tərk edəcəklərini deməyib.

“Suriyadan çəkiləcək ABŞ qoşunları İraq mərkəzi hökumətinin nəzarətindəki ərazilərə deyil, Ərbilə gətiriləcək. Bəlkə də daha sonra Ərbildən ABŞ-a və ya başqa bölgələrə qayıdacaqlar. ABŞ hərbçilərinin Suriyadan Ərbil üzərindən çəkilməsi İraqın suverenliyinin pozulması anlamına gəlmir və həmin əsgərlər İraqda daimi əsasda qalmayacaqlar”, - deyə general-mayor bildirib.

Qeyd edək ki, Tramp qoşunların Suriyadan çıxarılacağını bəyan etsə də, ABŞ hərbçilərinin Ərəb Respublikasından necə çəkiləcəklərinə dair indiyədək Pentaqonun açıqladığı hansısa konkret yol xəritəsi yoxdur.

Leyla Elbrusqızı
Azvision.az



Teqlər: Suriya   İraq   ABŞ   Ərbil  





Xəbər lenti