Azərbaycanda əhali peyvənd olunacaq

  09 Yanvar 2019    Oxunub : 3094
Azərbaycanda əhali peyvənd olunacaq
2019-cü ilin yazında Azərbaycanda böyük əhali kontingenti arasında peyvənd işləri həyata keçiriləcək.

Bu barədə Azvision.az -a açıqlamasında Səhiyyə Nazirliyinin Gigiyena və Epidemiologiya Mərkəzinin direktor müavini Afaq Əliyeva bildirib. Onun sözlərinə görə, artıq 200 min doza vaksin sifariş olub və yazda vaksinlər ölkəyə gətiriləcək.
Avropa ölkələri və bizimlə həmsərhəd ölkələrdə qızılca xəstəliyi geniş yayılıb. Bununla əlaqədar olaraq Azərbaycanda əlavə peyvənd işlərinin aparılması, immunlaşdırma tədbirlərinin həyata keçirilməsi üçün qızılca və məxmərəyə qarşı vaksin sifariş olunub. İki aydan sonra - mart ayının sonu, aprel ayının əvvəllərində həmin vaksinlərin Azərbaycana gətirilməsi nəzərdə tutulur. Bundan sonra əhalİ arasında əlavə immunlaşdırma tədbirləri çərçivəsində peyvənd işlərinin aparılması həyata keçiriləcək”.

A.Əliyeva vaksinasiyanın hansı əhali qrupu arasında aparılacağının müzakirə olunmadığını qeyd edib: “Vaksinlər ölkəyə gətiriləndən sonra konkret olaraq tədbirlər görə bilərik. Səhiyyə Nazirliyi ilə birlikdə vaksinlərin kimlərə, hansı kontingentə vurulması ilə bağlı müzakirələr aparılacaq. Vaksinlər poliklinikalara veriləcək və böyük əhali öz istəyi ilə yaxınlaşıb, peyvənd oluna biləcək. Bizdə səpkili xəstələr tək-tək hallarda müşahidə edilir. 2006-2014-cü illərdə böyük yaşlı əhali qızılcaya qarşı peyvənd olunub. Bunun nəticəsidir ki, başqa ölkələrdə hadisələr daha çox olur, bizdə tək-tək baş verir və əsasən böyüklər arasında müşahidə edilir. Əsasən vaxtilə peyvənd olunmayan insanlarda qızılca xəstəliyinə rast gəlinir”.

Aytən Zəhra
Azvision.az

Teqlər: Peyvənd   Səhiyyə-Nazirliyi