Akif Muradverdiyevin məhkəməsi başlayıb

Akif Muradverdiyevin məhkəməsi başlayıb
  15 Noyabr 2013    Oxunub:1258
Bu gün Xəzər Rayon Məhkəməsində Prezident Aparatının keçmiş işlər idarəsinin müdiri Akif Muradverdiyevin cinayət işi üzrə məhkəmənin hazırlıq iclası keçirilib.

A.Muradverdiyevin vəkili Rəşad Mirmehdizadənin verdiyi məlumata görə, prosesdə anket məlumatları dəqiqləşdirilib. Prosesdə onun barəsində olan cinayət işinə xitam verilməsi və barəsində seçilmiş həb-qətimkan tədbirinin dəyişdirilməsi barədə vəsatətlər verilib. Məhkəmə vəsatətləri təmin etməyib.
Prosesin baxış iclası növbəti həftə keçiriləcək.

Hüquq-mühafizə orqanlarının yaydığı məlumata görə, A. Muradverdiyev 2013-cü il iyunun 20-də saat 09:25 dəqiqədə Heydər Əliyev Beynəlxalq Hava Limanından Rusiya Federasiyasına aparmaq məqsədilə külli miqdarda dəyəri olan Çar Rusiyasına aid qədim qızıl pul sikkələrini qaçaqmalçılıq yolu ilə, yəni Azərbaycan Respublikasının gömrük sərhədindən gizli yolla gömrük nəzarətindən keçirib. O, Bakı-Moskva aviareysi ilə Rusiyaya uçmaq üçün Azərbaycan Respublikasının gömrük sərhədindən gömrük nəzarətindən keçdikdən dərhal sonra Milli Təhlükəsizlik Nazirliyinin əməkdaşları tərəfindən saxlanılıb. Qanunvericiliklə müəyyən edilmiş qaydada hal şahidlərinin iştirakları ilə keçirilən baxış zamanı onun əlində olan çantasından külli miqdarda dəyəri olan - Çar Rusiyasına aid 40 ədəd qədim qızıl pul sikkələri aşkar edilərək götürülüb.

Faktla bağlı Milli Təhlükəsizlik Nazirliyi İstintaq Baş İdarəsi tərəfindən Azərbaycan Respublikası CM-nin 206.1-ci (qaçaqmalçılıq) maddəsi ilə cinayət işi başlanıb. Akif Muradverdiyev təqsirləndirilən şəxs qismində cəlb olunaraq məhkəmənin qərarı ilə barəsində həbs-qətimkan tədbiri seçilib. (apa)


Teqlər:





Xəbər lenti