Millimiz ABŞ-lı həmkarlarını məğlub edib

  06 İyul 2019    Oxunub : 863
Millimiz ABŞ-lı həmkarlarını məğlub edib
Azərbaycanın gənclərdən ibarət sərbəst güləş üzrə yığması Olimpiya Güləş Mərkəzində təlim-məşq toplanışını davam etdirir.
Azərbaycan Güləş Federasiyasından (AGF) Azvision.az -a verilən məlumata görə, millimiz iyulun 3-dən Bakıda olan ABŞ-ın müvafiq komandası ilə birgə hazırlıq keçir. İyulun 6-da tərəflərin razılığına əsasən təlim-məşq bazasında komandalar arasında yoldaşlıq görüşü olub.

AGF-nın rəhbər şəxslərinin canlı izlədiyi, beynəlxalq dərəcəli hakimlərimizin idarə etdiyi qarşılaşmalar kifayət qədər maraqlı mübarizə şəraitində keçib. Yekunda yığmamız 12:2 hesablı qələbəyə sevinib.

Qonaq komandanın baş məşqçisi, Olimpiya çempionu Con Peterson AGF-nin rəsmi saytına açıqlama verib: “Bir neçə gündür ki, Bakıda yığmanızla birgə toplanış keçiririk. Bizim güləşçilər burada pəhləvanlarınızdan çox şey öyrənir. Bu baxımdan təlim-məşq toplanışından çox razıyam. Bu, Bakıya ilk səfərim deyil. Hələ SSRİ dövründə Azərbaycanda olmuşdum. 2007-ci ildə Bakıda keçirilən dünya çempionatı zamanı da ölkənizə səfər etmişdim. Onu deyə bilərəm ki, insanlarınız əvvəl necə qonaqpərvər idisə, indi də elədir”.

Azvision.az

Teqlər: Güləş   ABŞ   Azərbaycan