Neft Fondu: Yarım ildə 4 milyard dollardan çox vəsait satılıb

 Neft Fondu:    Yarım ildə 4 milyard dollardan çox vəsait satılıb
  23 İyul 2020    Oxunub:3433
Azərbaycan Respublikası Dövlət Neft Fonduna (ARDNF) daxil olan sorğulara cavab olaraq bildirir ki, bu ilin yanvar-iyun aylarında fond tərəfindən hərraclar vasitəsilə 4 milyard 10,1 milyon ABŞ dolları satılıb.
Fondun İctimaiyyətlə əlaqələr departamentindən Azvision.az -a bildirilib ki, bu vəsaitin bir hissəsi (5 milyard 675 milyon manat) yanvar-iyun ayları ərzində plana uyğun şəkildə dövlət büdcəsinə transfert edilib.

ARDNF cari ilin ilk 6 ayı üzrə investisiya fəaliyyətinə dair təqdimatını ( https://www.oilfund.az/storage/uploads/wwfnsts4ng.pdf ) ictimaiyyətə açıqlayıb. Təqdimatda da qeyd edilib ki, iyulun 1-nə ARDNF-in aktivlərinin tərkibinə digər valyutalarla yanaşı 586,7 milyon ABŞ dolları ekvivalentində, yəni 997,3 milyon manat daxildir ki, bu vəsait də ARDNF-in Mərkəzi Bankdakı hesabında saxlanılır və plana uyğun olaraq manatla olan öhdəliklərini yerinə yetirmək məqsədilə istifadə ediləcək.

Yuxarıda qeyd edilənləri nəzərə alaraq bir daha bildirmək istərdik ki, ARDNF fəaliyyəti barədə məlumatları daim ictimaiyyətə açıqlayır və bu prosesi davam etdirəcək. Fond hər zaman ictimaiyyətin və media nümayəndələrinin suallarını cavablandırmağa hazırdır.

Azvision.az


Teqlər: Fond   Neft   Dollar  





Xəbər lenti