Azərbaycanla Pakistan arasında saziş imzalandı - YENİLƏNİB
Nazir Ceyhun Bayramov Pakistanın hər zaman Azərbaycanın yanında olduğunu və Vətən müharibəsi dövründə Pakistan tərəfindən bütün səviyyələrdə, xüsusilə də Pakistan xalqı tərəfindən nümayiş etdirilən birmənalı dəstəyi məmnunluqla qeyd edib.
İki ölkə arasında mövcud olan tarixi və mədəni əlaqələri vurğulayan tərəflər, inkişaf etməkdə olan əməkdaşlıq münasibətləri, eləcə də beynəlxalq təşkilatlar çərçivəsində sərgilənən qarşılıqlı dəstək məsələlərini müzakirə ediblər.
Azərbaycan və Pakistan arasında yüksək səviyyəli səfər mübadilələrinin həyata keçirilməsinin ikitərəfli münasibətlərin inkişafına töhfə verəcəyi bildirilib.
Görüş zamanı, həmçinin ölkələr arasında ticarət, iqtisadi, kənd təsərrüfatı, enerji, nəqliyyat, turizm və digər kimi sahələrdə əlaqələrin daha da inkişaf etdirilməsi ətrafında fikir mübadiləsi aparılıb. İnsanlararası əlaqələr, habelə təhsil sahəsində əməkdaşlığın genişləndirilməsi müzakirə edilib, ADA Universiteti ilə Pakistanın Xarici Xidmət Akademiyası arasında münasibətlərin inkişaf etdirilməsi vurğulanıb.
Tərəflər görüşdə, həmçinin qarşılıqlı maraq doğuran digər məsələlər ətrafında fikir mübadiləsi aparıblar.
Görüşdən sonra nazirlər "Azərbaycan Respublikası Höküməti ilə Pakistan İslam Respublikası Hökuməti arasında fövqəladə halların qarşısının alınması, məhdudlaşdırılması və azaldılması sahəsində əməkdaşlıq haqqında saziş" imzaladılar.
***
(14:17)
Pakistan və Azərbaycan arasında İslamabadda Fəlakətlərin İdarə Edilməsi üzrə Əməkdaşlığa dair Anlaşma Memorandumu imzalanıb.
Azvision.az "DND" agentliyinə istinadən xəbər verir ki, sənədi xarici işlər nazirləri Şah Mahmud Qureyşi və Ceyhun Bayramov imzalayıblar.
Pakistanın Fəlakətlərin İdarəedilməsi üzrə Milli agentliyinin rəhbəri, general -leytenant Axtar Navaz da mərasimdə iştirak edib.
Razılaşmaya əsasən, Pakistan və Azərbaycan fövqəladə hallar və təbii fəlakətlərin fəsadlarının aradan qaldırılmasında bir-birilərinə kömək edəcəklər.
Bundan əvvəl iki ölkənin xarici işlər nazirləri nümayəndə heyətləri səviyyəsində danışıqlar aparıblar. Onlar Pakistan-Azərbaycan ikitərəfli əlaqələrinin bütün spektri, regional və beynəlxalq məsələləri müzakirə ediblər.
Pərvanə Sultanova
Azvision.az
Teqlər: Azərbaycan Pakistan