“Ölkəmizdə istifadə olunan vaksin yeni ştammlara qarşı effektlidir” - İnfeksionist

  04 Mart 2021    Oxunub : 1896
 “Ölkəmizdə istifadə olunan vaksin yeni ştammlara qarşı effektlidir” -  İnfeksionist
COVID-19 qasırğasının qarşısını almaq üçün ən önəmli yol peyvəndləmədir. Nəticə əldə etmək üçün cəmiyyətin 65-70%-i peyvənd olunmalıdır.
Azvision.az xəbər verir ki, bunu Mərkəzi Gömrük Hospitalının infeksionist həkimi Mədinə Abdullayeva deyib. O bildirib ki, peyvəndləmənin bu səviyyəyə çatmasına qədər virusdan qorunmada ən effektiv yol qaydalara ciddi riayət edilməsidir.

“Bu qaydalar əl və tənəffüs gigiyenası, sosial məsafə (1.5-2 metr) və maska taxmaqdır. Tünlük, yaxşı havalandırılmayan yerdə 15 dəqiqədən daha artıq qalacaqsınızsa, ikiqat maska taxılması tövsiyə olunur”.

Mutant virusların yoluxucu olduğunu deyən həkim infeksionist qeyd edib ki, onlar daha çox xəstəxana müalicəsinə və ölümə səbəb olur.

“Xəstəliklərə Nəzarət və Profilaktika Mərkəzlərinin məlumatına görə, peyvəndləmə Ro göstəricisini aşağı saldığı üçün yoluxuculuq azalır və mutant virusların ortaya çıxma ehtimalı aşağı düşür. Hazırda ölkəmizdə istifadə olunan "CoronaVAC" peyvəndinin koronavirusun Böyük Britaniya və Cənubi Afrika variantlarına qarşı effektli olduğu göstərilib. Peyvənd həyat qurtarır”, deyə M.Abdullayeva əlavə edib.

Aytən Zəhra
Azvision.az

Teqlər: Koronavirus   Peyvənd