“Qalib ölkənin xanımı olmaq ən gözəl hədiyyədir” - Fatma Mahmudova

  08 Mart 2021    Oxunub : 3011
“Qalib ölkənin xanımı olmaq ən gözəl hədiyyədir” -  Fatma Mahmudova
“Mənim üçün ən gözəl hədiyyə torpaqlarımızın işğaldan azad olunmasıdır”.

Bunu Azvision.az -a Xalq artisti Fatma Mahmudova 8 Mart Beynəlxalq Qadınlar Günü barədə danışarkən deyib. Tanınmış aktrisa Ordumuzun şanlı qələbəsini hədiyyə kimi qəbul etdiyini söyləyib:
“Mən Ordumuza, dövlət başçımıza təşəkkür edirəm. Onlar biz xanımlara hədiyyəni aylar öncə ölkəmizə qələbə gətirməklə verdilər. Qalib xalqın, qalib ölkənin xanımı olmaqdan gözəl hədiyyə nə ola bilər ki?! Bu il həyatımızda çox dəyişikliklər baş verdi. Koronavirus kimi bir infeksiya ilə üz-üzə qaldıq, aylardır işə çıxa bilmirik. Amma 44 günlük müharibədəki zəfərimiz bütün kədərimizi, sıxıntımızı arxada qoydu. Mən həmişə dövlətimizdən qayğı, hörmət görmüşəm. Dövlət mənə təqaüd verir ki, bu da mənim xoşbəxtliyimdir. Çünki ayrı güman yerim yoxdur”.

Bundan əlavə, xanım sənətçi yaxın günlərdə koronavirus əleyhinə peyvənd olunacağını vurğulayıb. O, həmçinin vətəndaşları vaksinasiyada iştirak etməyə çağırıb.

Şahanə Rəhimli
Azvision.az

Teqlər: Xalq-artisti