ÜST rəhbəri “AstraZeneca” ilə bağlı iddialara aydınlıq gətirdi

ÜST rəhbəri “AstraZeneca” ilə bağlı iddialara aydınlıq gətirdi
  13 Mart 2021    Oxunub:2847
COVID-19 əleyvinə peyvəndlərin sürətli və bərabər şəkildə paylanılmaması uzun zaman çəkərsə, insanlar ölməyə davam edəcək.

Azvision.az xəbər verir ki, bunu Ümumdünya Səhiyyə Təşkilatının (ÜST) baş direktoru Tedros Adhanom Qebreyesus deyib.
O bildirib ki, “AstraZeneca” peyvəndinin ikinci dozanı qəbul etmiş şəxslərdə tromblaşmaya səbəb olması Avropa Dərman Agentliyi tərəfindən təsdiqini tapmayıb.

“Bəzi ölkələr “AstraZeneca” peyvəndinin ikinci dozasını alan vətəndaşlarda qan laxtalanmasının olması məlumatlarını əsas götürərək vaksinasiyanı təxirə salıblar. Lakin Avropa Dərman Agentliyi peyvəndlə qan laxtalanması arasında əlaqəyə dair hər hansı bir işarə olmadığını bəyan edib. Agentlik peyvəndlə bağlı araşdırmaları apararkən vaksinasiya davam edə biləcəyini vurğulayıb”.

Qebreyesus ÜST-ün Qlobal Peyvənd Təhlükəsizliyi Məsləhət Komitəsinin peyvəndlərin təhlükəsizliyini sistematik olaraq nəzərdən keçirdiyini bildirib. Onun sözlərinə görə, “AstraZeneca” haqqında iddialar diqqətlə araşdırılır.

“ÜST tövsiyələrdə hər hansı dəyişiklik olarsa, bu barədə ictimaiyyətə məlumat verəcək”,- deyə Baş direktor əlavə edib.

COVAX platforması çərçivəsində 38 ölkəyə 29 milyona yaxın peyvənd paylandığını deyən T.A.Qebreyesus bildirib ki, ümumilikdə 144 ölkədə 335 milyon insan vaksinasiya olunub.

“Bunlardan 76 milyonu 10 ölkədə edilib. Peyvəndlərin adalətsiz paylanılması pandemiyanın sona çatmasının qarşısında böyük təhdiddir. Bütün ölkələr peyvənd istehsalını artırmaq üçün lazım olan ləvazimatları təcili əldə etməlidir. Qlobal pandemiya ilə heç bir ölkə təkbaşına mübarizə apara bilməz. Virus uzun müddət qalarsa, peyvəndlərin az təsirli olduğu yeni mutasiyaların ortaya çıxması ehtimalı yüksəkdir”.

Aytən Zəhra
Azvision.az


Teqlər: ÜST   Koronavirus   Vaksinasiya  



Xəbər lenti


Azvision.az ©2014 | Bütün hüquqları qorunur