“Şəhərimiz azaddır, bundan sevincli gün ola bilməz” - Şuşa sakini
"Şuşa şəhəri bu gün bizimdir. Bundan sevincli gün ola bilməz. Lakin ötən dövrü, işğal tarixini unutmamışıq. Şuşaya hazırda baxıram, erməni vəhşiləri evləri dağıdıblar, tarixi-mədəni abidələri məhv ediblər. Bizim izlərimizi itirmək istəyiblər. Birinci Qarabağ müharibəsində insanlarımız köçkün düşdü, yurdlarından didərgin oldular. 29 il az müddət deyil. Bu dövrdə bir çox soydaşlarımız Vətən həsrəti ilə dünyadan köçdülər. Kaş onlar da Şuşanın azad olunmasını eşidərdilər. Bunlar insanı kədərləndirir, lakin bu gün Şuşanın bizdə olması sevincinin həddi-hüdudu yoxdur. Şəhidlərimiz, qazilərimiz canlarını əsirgəmədi, bu dilbər güşəni azad etdilər. Sevincli günü bizə yaşatdılar. Onların qarşısında baş əyirəm. Bu gün bir gözümüz şəhidlərimizə görə ağlayırsa, digər gözümüz Şuşa azad olduğu üçün sevinc yaşları tökür".
Şuşaya iki gün öncə gəldiyini deyən həmsöhbətimiz burada özünü xoşbəxt hiss etdiyini söyləyib:
"Şuşa torpağına ayağımı ilk basanda hesab etdim ki, hər yanı gəzdim, çox böyük sevinc hissi yaşadım. Evizimizin olduğu yerə getdik. Evi yerlə-yeksan etmişdilər. Amma biz bunların hamısını bərpa edib, Şuşaya əvvəlkindən də gözəl həyatı qaytaracağıq".
Aytən Zəhra
Azvision.az
Teqlər: Şuşa