Minasyan “Anti-Nikol” hərəkatına başladı

  08 May 2021    Oxunub :2560
 Minasyan “Anti-Nikol” hərəkatına başladı
Ermənistanın sabiq prezidenti Serj Sarkisyanın kürəkəni, Vatikandakı keçmiş səfir Mikael Minasyan “Anti-Nikol” hərəkatı yaratdığını elan edib.
Azvision.az xəbər verir ki, bu barədə o, “Facebook” hesabında yazıb.

Minasyan bildirib ki, hərəkatın məqsədi baş nazir vəzifəsini icra edən Nikol Paşinyanı devirməkdir. Minasyan, Paşinyanın təşkil etdiyi səsvermənin vəziyyətdən çıxış yolu olmayacağını, buna görə də özü və komandasının erkən parlament seçkilərində iştirak etməyəcəyini bildirib.

Sabiq erməni səfir deyib ki, vəzifəsi vətəndaşlara Paşinyan seçərək ölümü seçdiklərini və övladlarını gələcəkdən, vətənlərindən məhrum etdiklərini izah etməkdir.

"Bu gün biz anti-Nikol hərəkatına başlayırıq. Bunun bir məqsədi var – Nikolun ölkə üçün fəlakət olduğunu izah etmək. Hərəkat siyasi qüvvələrin heç birinə dəstək verməyəcək, hər hansı blokun bir hissəsi olmayacaq. Ermənistanın Nikol ilə gələcəyi yoxdur, qardaşlarımızı öldürən, anaları oğullarından, qadınları ərlərindən, uşaqları atalarından məhrum edən o idi".

Minasyana görə, hərəkat seçki kampaniyası xaricində olacaq, Paşinyanı pislərin ən pis hesab edənlərin hamısını cəlb edəcək. Hərəkatın lideri olmayacaq, siyasi ambisiyalar irəli sürülməyəcək.

Pərvanə Sultanova
Azvision.az

Teqlər: MikaelMinasyan