“Müharibədə ağır itkilər verdik, acınacaqlı vəziyyətdəyik” - Erməni hərbi ekspert

 “Müharibədə ağır itkilər verdik, acınacaqlı vəziyyətdəyik” -  Erməni hərbi ekspert
  02 İyun 2021    Oxunub:1271
“Müharibə nəticəsində ağır itkilər verdik. Orta komanda heyəti ciddi zərbə alıb, bir çox zabit vəzifəsi hələ də boş qalıb. Nəticədə digər komandirlərin yükü təbii olaraq artıb”.
Azvision.az xəbər verir ki, bunu erməni hərbi ekspert, Ermənistanın keçmiş müdafiə naziri Seyran Ohanyanın müşaviri olmuş David Camalyan İkinci Qarabağ müharibəsindən sonra erməni ordusunda mövcud olan vəziyyəti şərh edərkən bildirib.



Hərbi ekspert vurğulayıb ki, müharibədən sonra Ermənistan Silahlı Qüvvələrinin döyüş qabiliyyəti ciddi şəkildə aşağı düşüb: “Ordu yaralanıb. Aşağı döyüş effektivliyi birbaşa orduda intizam pozuntularına səbəb olur. Beləliklə, döyüş effektivliyindəki azalma mənəvi və psixoloji problemlərə də səbəb olur. Bu cür vəziyyətlərin birbaşa səbəbi nizam-intizam və nəzarətin azalmasıdır”.

Onun sözlərinə görə, orduya nəzarət azaldıqdan sonra hərbçilərin xidmət etdiyi ərazini tərk etməsi və ya intiharı qaçılmazdır: “Çox acınacaqlı vəziyyətdəyik. Belə bir halda, vətən müdafiəçisi özünü müdafiəsiz hiss edir”.

İlkin Nəcəfzadə
Azvision.az


Teqlər: Ermənistan   Ordu  





Xəbər lenti