Qarabağın enerji strategiyası hazırlanıb

  06 İyul 2021    Oxunub :309
Qarabağın enerji strategiyası hazırlanıb
Azərbaycan Respublikası Prezidentinin tapşırıqlarına uyğun olaraq, "Azərenerji" ASC tərəfindən işğaldan azad edilən ərazilərdə elektroenergetika strukturunun yaradılması və respublika enerji sisteminə inteqrasiya edilməsi istiqamətində Qarabağ enerji strategiyası hazırlanıb.
Azvision.az xəbər verir ki, bu barədə Azərenerji ASC-nin şöbə rəisi Muxtar Mahmudov məlumat verib. Onun sözlərinə görə, Qarabağ enerji strategiyası özlüyündə hər bir rayonumuzda 110 kVt-lıq yarımstansiyaların tikintisini və onların yüksəkgərginlikli xətlərlə ölkə sisteminə inteqrasiyasını əhatə edir: "Məlumat üçün bildirmək istəyirəm ki, Qarabağ regionunda regional mərkəz kimi Ağdam şəhərinin seçildiyini nəzərə alaraq "Azərenerji" ASC Ağdamda 2 ədəd 110 kilovattlıq yarımstansiyanın tikintisinə başlanılıb. Gələcəkdə artım tələbatdan asılı olaraq yeni yarımstansiyaların tikintisi də mümkündür".

Qurum rəsmisi onu da bildirib ki, bu ilin sonuna qədər Qarbağ enerji strategiyası çərçivəsində bütün işğaldan azad olunmuş rayonlarımızda yarımstansiyalarımız fəaliyyət göstərəcək: "Bundan başqa, digər rayonlarımızda - Cəbrayıl, Zəngilan, Qubadlıda da 110 kVt-lıq yarımstansiyaların tikintisi davam etdirilir. Daha əvvəl isə Füzuli və Şuşada belə yarımstansiyaların açılışı olub. Həmçinin, kiçik su elektrik stansiyalarının bərpası istiqamətində də "Azərenerji" ASC tərəfindən işlər aparılır".

Azvision.az

Teqlər: Qarabağ   Enerji  






Xəbər lenti