Azvision.az gənc tələbəni və onun qardaşını himayəsinə götürən nənəsi Ağgül Əliyeva ilə söhbətləşib. Ağgül xanım qızının övladlarının məktəb və tələbə həyatından söz açıb. O bildirib ki, Sevil valideyinlərinin vəsiyyətinə əməl edərək Bakıda deyil, Gəncədə təhsil almağı üstün tutub.

“Sevilin valideyinləri onun Gəncədə təhsil almasını istəyirdilər. Biz nəvəmə Bakıda təhsil almasını təklif edəndə o bizə bildirdi ki, ana və atasının istəyini yerinə yetirərək Gəncədə qalacaq. Nəvəm tələbə sevincini heç kəslə bölüşə bilmədi. Dedi, valideyinlərim yanımda yoxdur, sevincim yarımçıqdır. Çox çətindir. (ağlayır)

Onu dünən universitetə mən yola saldım. Dərsdən evə gələnə kimi qohumlarımızla yığışıb ona sürpriz hazırladıq. Nəvəm qapıdan girəndə onu tort və üzərində şamla qarşıladıq. Bu Sevili çox sevindirdi, ürəyi şadlandı. Belə bir sürprizi gözləmirdi”.



Sevil və səkkiz yaşlı qardaşı Hüseynin qayğısına anasının valideyinləri qalır. Onlar Gəncədə dövlətin bağışladığı iki otaqlı mənzildə yaşayırlar.

“Dövlətimizin bağışladığı birinci evdə atasının valideyinləri olur. Uşaqlar isə bizimlə birgə ikinci dəfə verilən evdə yaşayırlar. Nənə, baba, xala onları tək qoymur. Ata tərəfin qohumları isə 7-i mərasimindən sonra yaxın durmayıblar. Uşaqlar dərs günləri şəhərdə, tətillərdə isə kənddə olacaqlar”, - deyə A. Əliyeva bildirib.

Xatırladaq ki, ötən il oktyabrın 11-də Gəncəyə atılan raket nəticəsində 16 yaşlı Sevil və 8 yaşlı qardaşı Hüseyn hər iki valideynini itirib.



Şahanə Rəhimli
Azvision.az