Azərbaycan, Türkiyə və Gürcüstan parlamentariləri Ankarada görüşüb

 Azərbaycan, Türkiyə və Gürcüstan parlamentariləri Ankarada görüşüb
  19 Oktyabr 2021    Oxunub:1177
Oktyabrın 18-də Azərbaycan, Türkiyə və Gürcüstan parlamentlərinin xarici əlaqələr komitə sədrlərinin Türkiyə Böyük Millət Məclisində (TBMM) üçtərəfli görüşü keçirilib.
AzVision.az bu barədə TBMM-nin mətbuat xidmətinə istinadən xəbər verir.

Türkiyə Parlamentinin Xarici İşlər Komissiyasının rəhbəri Akif Çağatay Kılıç Azərbaycan Milli Məclisinin Xarici Əlaqələr və Parlamentlərarası Əlaqələr Komitəsinin sədri Səməd Seyidov və Gürcüstan Parlamentinin Xarici Əlaqələr Komitəsinin sədri Nikoloz Samxaradze ilə görüşüb. Türkiyə-Azərbaycan-Gürcüstan parlamentlərinin bu il 6-cı iclasının keçirildiyini bildirən Akif Çağatay Kılıç bu toplantıların region üçün böyük əhəmiyyət daşıdığını bildirib.
Bu yaxınlarda Türkiyə ilə Azərbaycan arasında ikitərəfli görüş keçirildiyini xatırladan Səməd Seyidov da Türkiyə, Azərbaycan və Gürcüstan birliyinin regionda vacibliyini vurğulayıb.

"Hazırda dost və qardaş ölkələr arasında Gürcüstanın da olması böyük şərəfdir", Seyidov deyib.

Nikoloz Samxaradze isə Gürcüstanın xarici siyasətində ən vacib məsələnin Türkiyə və Azərbaycanla əlaqələrin dərinləşdirilməsi olduğunu diqqətə çatdırıb: "Bu iki ölkə ilə bağlılığımız yalnız tarixi əlaqələrlə məhdudlaşmır, həm də birlikdə regional iqtisadi və infrastruktur layihələr həyata keçiririk".

Qeyd edək ki, bu gün Türkiyə, Azərbaycan və Gürcüstan xarici əlaqələr komitələrinin nümayəndə heyətlərinin birgə iclası olacaq. Komitələrin birgə toplantısında regional və parlamentlərarası əməkdaşlığın genişləndirilməsi, qanunvericilik sahəsində informasiya və təcrübə mübadiləsi, ölkələrimiz arasında siyasi, iqtisadi, humanitar, mədəni əlaqələrin inkişafı və digər məsələlər müzakirə olunacaq.

Azərbaycan Milli Məclisinin Beynəlxalq münasibətlər və parlamentlərarası əlaqələr komitəsinin sədri Səməd Seyidovun rəhbərlik etdiyi nümayəndə heyətinə azərbaycanlı deputatlardan Sevinc Fətəliyeva, Tural Gəncəliyev və Sahib Alıyev daxildir.

AzVision.az




Teqlər: Azərbaycan   Türkiyə   Gürcüstan  





Xəbər lenti