Bakı Şəhər İcra Hakimiyətindən AzVision.az -a verilən məlumata görə, artıq istirahət parkları və bir sıra meydanlarda bayram yolkalarının qurulmasına başlanıb. Paytaxtın ən iri yolkası bu il Azneft meydanında qurulur. Bakı şəhər rayonlarının hər birindəki parklarda bayram yolkaları qurulacaq. Eyni zamanda yolkaların yerləşdiyi parkların, buradakı ağacların çilçıraqlarla bəzədilməsi, müxtəlif yeni il atributların və simvollarınin, nağıl qəhrəmanları fiqurlarının quraşdırılması, burada bayram tərtibatının aparılması işləri həyata keçirilməsinə başlanılıb. Bayram günlərində uşaqların və böyüklərin istirahətinin şən və səmərəli keşirilməsi üçün lazımı şərait yaradılır.

Bayram tərtibatı və hazırlıq işləri Dənizkənarı Bulvarda və İçəri şəhərdə də aparılır.

Eyni zamanda təsdiq olunmuş dislokasiyalara uyğun olaraq Bakı Şəhər Ticarət və Xidmət Departamenti tərəfindən əsas etibarı ilə metro stansiyalarının çıxışlarında çadırlar qurulub ki, burada da şəhər sakinləri və qonaqlar üçün bayram yarmarkaları təşkil olunub.

Parkların bəzədilməsi və yolkaların qurulması işlərinın dekabr ayının 22-nə kimi başa çatdırılması nəzərdə tutulub.

Ümumilikdə isə bu il Yeni il bayramı ilə bağlı şənliklərinin keçirilmə qaydaları Nazirlər Kabineti yanında Operativ Qərargah tərəfindən müəyyənləşdirib.

Paytaxt sakinlərindən xahiş edirik ki, Yeni il bayramı ilə əlaqədar şənlik mərasimlərinin təşkil olunduğu məkanlarda pandemiya ilə bağlı müəyyən edilmiş mövcud qaydalara və tələblərə uyğun hərəkət etsinlər, özlərini, ailə üzvlərini və yaxınlarını xəstəliyə yoluxmaqdan qorusunlar.

Aytən Zəhra
AzVision.az