Jurnalistlər arasında keçirilmiş "Sərrast jurnalist" turnirinin məqsədi bir qədər fərqli idi. Bakı Atıcılıq Mərkəzinin direktoru Tamerlan Hacıyev deyib ki, bu cür turnirlərin keçirilməsində məqsəd bu idman növünün daha geniş təbliğ edilməsidir: "Bu gün Bakı Atıcılıq Mərkəzində media nümayəndələri arasında "Sərrast jurnalist"adlı maraqlı turnir keçirilib. Turnirdə müxtəlif media orqanlarından 50-yə yaxın jurnalist qeydiyyatdan keçib. Məqsəd idmanın bu növünə marağın artmasına şərait yaratmaq və bu sahə ilə maraqlanan jurnalistləri Bakı Atıcılıq Mərkəzi ilə tanış etməkdir”.


Tamerlan Hacıyevin sözlərinə görə, bu gün atıcılığa turistlər arasında daha çox maraq var: “Biz istərdik ki, yerli əhali arasında da bu idman növünə marağı artıraq. Vətəndaşlarımız arasında da bu sahəyə marağın artması bizim beynəlxalq turnirlərdə daha çox peşəkar atıcı ilə təmsil olunmağımız deməkdir. Həftə içi, eləcə də həftə sonları mərkəzə gələrək övladlarınızın bu idman növü ilə məşğul olmasına, özünüzün istirahətinə nail ola bilərsiniz".


"Sərrast jurnalist" turnirinin qalibi "Space TV"nin nümayəndəsi Kamal Hüseynli oldu, ikinci yeri Azad Azərbaycan Teleradio şirkətinin əməkdaşı Təbriz Abdullayev, 3-cü yeri "Yeni Çağ" saytının əməkdaşı jurnalisti Səxavət Məmməd tutdular.


Qeyd edək ki, 2015-ci ildə istifadəyə verilmiş Bakı Atıcılıq Mərkəzi 20 hektaradək sahəni əhatə etməklə, infrastrukturu və təchizatı ilə Avropanın ən yaxşı 4 mərkəzindən biri hesab olunur. Bura həm aktiv istirahət etmək istəyənlər, həm də bu idmanla məşğul olanlar üçündür. Atıcılığa marağı olan hər kəs mərkəzə üz tuta bilər. Yerli əhali arasında maraq az olsa da, turistlər bu idman növü ilə məşğul olmağı sevirlər.


Hansısa idman növündə yaxşı idmançıların yetişməsi bu sahəyə kütləvi marağın artmasından da asılıdır. Bakı Atıcılıq Mərkəzində aktiv istirahət üçün hər cür şərait var. Əvvəlcə peşəkarlar tərəfindən atıcılıqla bağlı bütün qaydalar izah olunur. Təhlükəsizlik şərtləri tam şəkildə təmin edildikdən sonra hədəfləri nişan almaq olar.

Qalereya