Miqrasiya Xidməti “Asan xidmət indeksi” üzrə mükafatlandırılıb

 Miqrasiya Xidməti “Asan xidmət indeksi” üzrə mükafatlandırılıb
  08 Fevral 2023    Oxunub:695
Dövlət Miqrasiya Xidməti (DMX) “Asan xidmət indeksi” üzrə qiymətləndirmə nəticələrinə dair təqdimatda mükafatlandırılıb.
DMX-dən verilən məlumata görə, təqdimat mərasimində 2018-2021-ci illər ərzində ən yüksək göstəricilərə nail olmuş Dövlət Miqrasiya Xidməti xüsusi mükafata layiq görülüb, mükafat Xidmətin rəisi Vüsal Hüseynova təqdim olunub. Xidmət rəisi çıxış edərək göstərilən diqqətə görə təşəkkürünü bildirib. O, dövlət xidmətlərinin göstərilməsində vətəndaş məmnunluğunun və şəffaflığın təmininin Xidmət üçün əsas prioritetlər sırasında olduğunu və fəaliyyətin optimallaşdırılması istiqamətində görülən tədbirlərin davam etdiriləcəyini diqqətə çatdırıb. Qeyd edilib ki, bu qiymətləndirmələr nəticəsində həyata keçirilən təkmilləşdirmələr vətəndaşların rahatlığının və məmnunluğunun artırılmasına töhfə verir.

Tədbirdə 2022-ci ildə “ASAN xidmət indeksi” üzrə qiymətləndirmə ilə bağlı qısa təqdimat keçirilib və nəticələr açıqlanıb. Sonra mərkəzi icra hakimiyyəti, yerli icra hakimiyyəti və hüquqi şəxslər üzrə ən yüksək göstəriciləri olan qurumlar mükafatlandırılıb.

Qeyd edək ki, Dövlət Miqrasiya Xidməti ötən il “ASAN xidmət indeksi” üzrə göstəriciləri 92,78 faizə yüksəldərək ardıcıl dördüncü dəfə ən yaxşı nəticə göstərib.

Xatırladaq ki, qiymətləndirilmənin keçirilməsində əsas məqsəd dövlət xidmətləri haqqında məlumatların vahid mənbədə toplanması və sistemləşdirilməsi, xidmətlərin göstərilməsində təkrarlığın aradan qaldırılması və yeni növ xidmətlərin yaradılması yolu ilə bu sahədə idarəetmənin çevikliyinin təmin edilməsi, xidmətlər üzrə təhlil və proqnozlaşdırma imkanlarının artırılmasıdır.

AzVision.az



Teqlər:





Xəbər lenti