Əlcəzairdə Azərbaycanın Müstəqillik Günü qeyd edilib

Əlcəzairdə Azərbaycanın Müstəqillik Günü qeyd edilib
  28 May 2024    Oxunub:764
Müstəqillik Günü və Azərbaycan ilə Əlcəzair arasında diplomatik münasibətlərin qurulmasının 30 illik yubileyi münasibətilə Azərbaycan Respublikasının Əlcəzair Xalq Demokratik Respublikasındakı (ƏXDR) səfirliyi ziyafət təşkil edib.
Səfirlikdən AzVision.az -a bildirilib ki, ziyafətdə Milli Məclis sədrinin müavini Əli Talbi, Parlamentin Əlcəzair-Azərbaycan dostluq qrupunun üzvləri, Milli Assambleyanın deputatları, ƏXDR nazirliklərinin yüksəkvəzifəli nümayəndələri, ölkədə akkreditə olunan xarici dövlətlərin səfirləri, Əlcəzairin tanınmış siyasi-ictimai xadimləri, elm və mədəniyyət nümayəndələri, burada yaşayan, işləyən həmvətənlrimiz, yerli media nümayəndələri iştirak ediblər.

Mərasimdə çıxış edən səfir Tural Rzayev Azərbaycan Xalq Cümhuriyyətinin yaranması tarixi və o dövrdə qəbul olunan demokratik qanunlar, 1991-ci ildə müstəqilliyimizin bərpasından sonra qarşılaşdığımız böhran vəziyyəti və bundan sonra dövlətimizin əldə etdiyi nailiyyətlərdə Azərbaycan xalqının Ümummilli Lideri Heydər Əliyevin misilsiz xidmətləri, Ermənistanın otuz ilə yaxın davam edən işğalı və Müzəffər Ali Baş Komandan İlham Əliyevin müdrik rəhbərliyi sayəsində 44 günlük müharibə nəticəsində qazanılan Zəfər, ölkəmizin iqtisadi inkişafı və aparılan demokratik islahatlar, azad olunmuş və ermənilər tərəfindən dağıdılmış halda olan ərazilərimizdə tikinti-bərpa və quruculuq işləri, sürətlə inkişaf edən Azərbaycan-Əlcəzair münasibətləri barədə qonaqlara ətraflı məlumat verib.

Tədbir iştirakçılarına Azərbaycan Respublikasının UNESCO-nun Bəşəriyyətin qeyri-maddi mədəni irsi üzrə Reprezentativ Siyahısına daxil edilən qadın ipək baş örtüyü kəlağayının, milli musiqi alətləri, Azərbaycan xalq tətbiqi sənəti və onun bir qolu olan xalçaçılıq nümunələri və milli geyimlərin sərgisinin təqdimatından sonra milli rəqs qrupu çıxış edib.

Tədbirdə, həmçinin bir müddət Əlcəzairdə yazıb-yaratmış Azərbaycanın görkəmli bəstəkarı Rauf Hacıyevin, habelə Üzeyir Hacıbəyli, Qara Qarayev, Fikrət Əmirovun əsərləri səsləndirilib. 28 May - Müstəqillik Gününə həsr edilən tədbir Əlcəzair mediasında geniş işıqlandırılıb.

AzVision.az



Teqlər:





Xəbər lenti