WP: “Zelenski tədricən öz mövqeyini

WP: “Zelenski tədricən öz mövqeyini dəyişir”

16:03 23 Dekabr 2024 Oxunub:336

Donald Trampın ABŞ-də hakimiyyətə gəlməsi və Ukrayna Silahlı Qüvvələri üçün cəbhədə yaranmış çətin vəziyyət Volodimir Zelenskini Rusiya ilə gələcək danışıqlarda mövqeyini yumşaltmağa sövq edir.

AzVision.az xəbər verir ki, Amerikanın “The Washington Post (WP)” qəzeti Ukrayna prezidenti Volodimir Zelenskinin son həftələrdə müharibəni bitirmək üçün danışıqlara daha çox hazır olduğuna siqnallar verdiyini yazır. Bu isə, uzun müddətdir ki, ölkəsinin hər qarış torpağı üçün mübarizə aparacağına söz verən Ukrayna lideri üçün böyük dəyişiklikdir.

“Ukrayna və Qərb rəsmilərinin nəzərinə çarpan reallıq - Zelenskinin ritorikasının dəyişməsi çox güman ki, cəbhə xəttində vəziyyətin pisləşməsi və Kiyevə gələcək təhlükəsizlik yardımını şübhə altına alan yeni ABŞ administrasiyasının hakimiyyətə gəlməsi ilə izah oluna bilər”, - qəzetdə dərc edilən materialda vurğulanır.

Əvvəllər Zelenski danışıqların yalnız Moskva bütün qoşunlarını Ukrayna ərazisindən çıxardıqdan sonra başlaya biləcəyini bəyan edirdi. Bununla belə, Tramp və Avropa liderləri ilə son görüşlərdə Ukrayna prezidenti daha çox Kiyev üçün “davamlı sülhün” əldə edilməsi şərtinə köklənib.

İndi əsas prioritet NATO hərbi alyansına dəvət almaq və Rusiyanın gələcək hücumlarının qarşısını kəsmək üçün Qərb sülhməramlılarının mümkün iştirakı kimi digər təhlükəsizlik təminatlarını təmin etməkdir. Məmurların və analitiklərin fikrincə, Zelenskinin ritorikasının dəyişməsi, çox güman ki, Trampın münaqişəni sona çatdırmaq barədə bəyanatına uyğunlaşmaq cəhdidir.

- Zelenskinin administrasiyası Trampın dövründə hər şeyin dəyişəcəyini anlayır. Düşünürəm ki, bu, Zelenski üçün onu nə olursa-olsun 1991-ci il sərhədlərinə qədər döyüşəcəkləri mövqeyindən azad edir. İndi o, “Mən bunu böyük məmnuniyyətlə etmək istərdim, amma Tramp gəldi və hər şey dəyişdi” ifadəsini işlədə bilər”, - Amerikanın Rusiyadakı keçmiş səfiri Maykl Makfol vurğulayıb.

Sahil İsgəndərov
AzVision.az

Teqlər: Zelenski ritorika dəyişiklik