Suriyalı nazirlər Kremldə Putinlə görüşüblər

Suriyalı nazirlər Kremldə Putinlə görüşüblər
  24 Dekabr 2025    Oxunub:805
Suriyanın keçid hökumətinin nümayəndələri – Xarici İşlər naziri Əsəd Şeybani və Müdafiə naziri Murhaf Əbu Kəsra Rusiya prezidenti Vladimir Putinlə ikitərəfli hərbi-texniki əməkdaşlığın inkişaf perspektivlərini müzakirə etmək üçün danışıqlar aparıblar.
AzVision.az xəbər verir ki, “SANA” agentliyinin məlumatına görə, Rusiya ilə müdafiə sahəsində əməkdaşlıq Suriyada və bütün Yaxın Şərq regionunda təhlükəsizliyin və sabitliyin möhkəmləndirilməsinə yönəlib.

“Danışıqlar zamanı tərəflər hərbi texnikanın modernləşdirilməsi və müasir təkmilləşdirmələrin tətbiqi, habelə hərbi-texniki təcrübənin ötürülməsi yolu ilə Suriya ordusunun müdafiə qabiliyyətinin artırılması məsələlərini müzakirə ediblər. Hərbi sənaye kompleksində əməkdaşlığın strateji xarakter daşıması xüsusi vurğulanıb”, - məlumatda deyilir.

Bundan əlavə, aktual regional və beynəlxalq məsələlər ətrafında fikir mübadiləsi zamanı görüş iştirakçıları “Beynəlxalq forumlarda Dəməşq və Moskva arasında siyasi və diplomatik koordinasiyanın vacibliyini” vurğuladılar.

Kremlin mətbuat xidməti hələlik belə bir görüşün olduğu barədə məlumat verməyib.

Sahil İsgəndərov
AzVision.az


Teqlər: Putin   Suriya   danışıqlar  



Xəbər lenti