FT: “Vaşinqtonla kanadalı separatçılar arasında gizli

FT: “Vaşinqtonla kanadalı separatçılar arasında gizli görüşlər olub”

15:00 29 Yanvar 2026 Oxunub:1314

Donald Tramp administrasiyası Kanadanın Alberta əyalətinin müstəqilliyini dəstəkləyən “Alberta Prosperity Project (APP)” separatçı hərəkatının nümayəndələri ilə bir neçə gizli görüş keçirib.

AzVision.az xəbər verir ki, mənbələrə istinad edən “Financial Times (FT)” nəşrinin məlumatına görə, 2025-ci ilin aprelindən bəri APP liderləri Vaşinqtonda ABŞ Dövlət Departamentinin rəsmiləri ilə üç dəfə görüşüblər. Fevral ayında daha bir görüşün keçirilməsi planlaşdırılır. Həmin görüşdə APP nümayəndələrinin müstəqillik referendumunun keçiriləcəyi təqdirdə əyalətin ehtiyaclarını maliyyələşdirmək üçün 500 milyard dollar kredit istəyəcəyi bildirilir.

“ABŞ azad və müstəqil Alberta ideyasından çox ruhlanıb. Mən özüm isə Kanadanın baş naziri Mark Karnidən daha çox Tramp administrasiyası ilə güclü əlaqələrə malikəm”, - gizli danışıqlarda iştirak edən APP-nin hüquq məsləhətçisi Ceff Ratt vurğulayıb.

ABŞ Dövlət Departamentinin sözçüsü qurumun mütəmadi şəkildə Kandanın vətəndaş cəmiyyəti nümayəndələri ilə görüşdüyünü təsdiqləsə də, onların qarşısında heç bir öhdəlik götürmədiyini iddia edib.

Görüşlərin baş tutduğunu təsdiqləyən Ağ Ev, öz növbəsində, bu məsələdə kanadalı separatçılara heç bir dəstək vermədiyini vurğulayıb.

ABŞ-nin maliyyə naziri Scott Bessentin mövqeyi ilə tanış olan mənbənin sözlərinə görə, nə Bessentin, nə də digər xəzinədarlıq rəsmilərinin kredit təklifindən xəbəri yoxdur və onlar bu məsələni müzakirə etmək niyyətində deyillər.

Qeyd edək ki, neftlə zəngin olan Kanadanın Alberta əyaləti Amerika bazarında ən böyük xarici neft mənbəyidir.

- APP nümayəndələri ilə Tramp administrasiyası arasında görüşlər Vaşinqton və Ottava arasında münasibətlərdə gərginliyin artması fonunda keçirilir. Davosda keçirilən Dünya İqtisadi Forumunda (DİF) tənqidi çıxışında Kanadanın baş naziri Mark Karni ABŞ ilə qarşıdurmada Qrenlandiyaya dəstəyini bildirdi. Bundan sonra isə Tramp yaratdığı Sülh Şurasına Kandanın dəvətini geri götürdüyünü açıqladı”, - qəzet xatırladır.

Sahil İsgəndərov
AzVision.az

Teqlər: ABŞ Kanada separatçılar