Kino dünyasında tarixi anlar yaşanır. Pop musiqisinin əfsanəvi kralı Maykl Ceksonun həyat və yaradıcılığından bəhs edən, rejissor Antuan Fukuanın imzasını daşıyan "Michael" bioqrafik dramı qlobal kassa gəlirlərində 977 milyon ABŞ dolları səddini aşaraq rəsmən dünya kino tarixinə düşüb. Məşhur sənaye dərgisi Variety-nin yaydığı son məlumatlara görə, ekran işi bu göstərici ilə bütün zamanların ən çox gəlir gətirən bioqrafik filmi statusunu qazanıb.

​"Michael" filmi bu möhtəşəm gəlirlə kino sənayesində toxunulmaz hesab olunan bir neçə böyük rekordu eyni anda yeniləyib.

​Filmin əsas rəqibi, Kristofer Nolanın rejissorluğu ilə 7 Oskar mükafatı qazanan və dünya üzrə 975 milyon dollar toplayan "Oppenheimer" dramı idi. "Michael" cəmi bir neçə həftə ərzində bu rəqəmi keçərək liderliyi ələ alıb.
​
Ekran işi, həmçinin Freddi Merkurinin həyatını işıqlandıran və musiqi janrında lider olan "Bohemian Rhapsody" (911 milyon dollar) filminin də rekordunu tarixin arxivinə gömüb.

​Bu uğur filmin distribütoru olan Lionsgate studiyası üçün də intibah dövrüdür. Ost-fentezi janrında olan "The Hunger Games" (Aclıq Oyunları) franşizasını geridə qoyan film, studiyanın 29 illik tarixində ən yüksək gəlir əldə edən ekran işi olub.

​Filmin bu dərəcədə böyük uğur qazanmasının ən böyük səbəblərindən biri baş rol seçimidir. Pop ikonunu canlandırmaq üçün Hollivudun onlarla tanınmış siması sınaqdan keçirilsə də, rejissor Antuan Fukua rolu Maykl Ceksonun öz doğma qardaşı oğlu — 1996-cı il təvəllüdlü Jaafar Jackson-a (Cafar Cekson) həvalə etdi.

​Kino tənqidçiləri və izləyicilər Jaafarın performansını "heyranedici" və "tükürpədici dərəcədə real" adlandırırlar. Gənc aktyor təkcə vizual oxşarlığı ilə deyil, həm də əmisinin unikal səs tonunu, mürəkkəb xoreoqrafiyalarını və emosional daxili dünyasını ekranda canlandırmaqla tamaşaçıları heyran qoymağı bacarıb. Ssenari müəllifi, üçqat Oskar nominantı Con Loqan (Gladiator, Aviator) isə sənətçinin uşaqlıq illərindən başlayaraq, "Jackson 5" qrupu ilə parlamasını, "Thriller" dövrünün qlobal çılğınlığını və ömrünün son illərindəki qalmaqallı, dramatik hadisələri obyektiv şəkildə ssenariyə köçürüb.
​
Dünyada Cekson İntibahı ​"Michael" filminin nümayişi təkcə kinoteatr salonları ilə məhdudlaşmayıb, qlobal bir mədəni dalğa yaradıb.

​Statistika göstərir ki, kinoteatrlara axın edən tamaşaçıların böyük bir qismini sənətçini sağlığında görməyən, onun irsini sosial şəbəkələr və rəqəmsal platformalar vasitəsilə kəşf edən gənc nəsil (Gen Z) təşkil edir.

Filmin vizual effektlərlə zənginləşdirilmiş konsert səhnələri o qədər böyük maraq doğurub ki, nümayişdən sonra Spotify və Apple Music platformalarında Maykl Ceksonun "Billie Jean", "Beat It", "Smooth Criminal" və "Man in the Mirror" kimi ölməz hitlərinin dinlənmə sayı 200%-dən çox artıb.

​Kinoteatrlarda nümayişi hələ də uğurla davam edən "Michael" filminin çox yaxın günlərdə 1 milyard dollar psixoloji limitini keçəcəyi gözlənilir. Əgər bu baş verərsə, ekran işi dünya kino tarixində 1 milyardlıq kassa toplayan ilk saf bioqrafik/musiqili film kimi adını qızıl hərflərlə yazdıracaq.

​Hollivud insayderləri və kino analitikləri artıq indidən qeyd edirlər ki, gələn il keçiriləcək Oskar (Academy Awards) mükafatlarında "Michael" filmi, xüsusilə də baş rol ifaçısı Jaafar Jackson "Ən Yaxşı Kişi Rolu" nominasiyasında ən güclü favoritlərdən biri olacaq.