Vladimir Putin haqqında qəzet yazır: "Duzlu danışığı ilə məşhurdur, fikirlərini kəskin şəkildə səsləndirməyi xoşlayır. Danışarkən hər hansı güzəştə yer qoymur".

Putin "alman dilini əla bilməyi ilə öyünür, deyirlər ki, Almaniya Federativ Respublikasının keçmiş kansleri Gerhard Şröderlə dostluğu onun dillə bağlı bilgilərinə müsbət təsir edib". Qəzetin iddiasına görə cənab Putin çəkinmədən alman dilində siyasi söhbətlərə girişir. Özü də göz-gözə söhbət etməyə üstünlük verir. Düzdür, köməkçiləri yanında olanda o, rus dilində danışmalı olur. Çünki diplomatik protokol belə tələb edir.

"Prezident olduqdan sonra cənab Putin ingilis dilini də öyrəndi. Ancaq deyirlər ki, cüdo üzrə qara kəmər sahibi olan bu şəxs hələ də bizim dildə saitləri düzgün tələfüz edə bilmir. O, çox nadir hallarda publika qarşısında ingilis dilində danışır. Diplomatik görüşlər zamanı isə ümumiyyətlə ingiliscədən istifadə etməz", məqalədə belə deyilir. Düzdür, o, Soçidə olimpiya oyunlarının keçirilməsi ilə bağlı Beynəlxalq Olimpiya Komitəsinin toplantısında ingiliscə etdiyi çıxışı ilə bu təşkilatın yetkililərini özünə heyran etdi. Bir dəfə isə cənab Putin xeyriyyə məqsədi ilə Blueberry Hill-ın mahnısını ingiliscə oxuyub.

Bütün bunları sadaladıqdan sonra "The Guardian" qəzeti 10 ballıq göstərici üzrə Vladimir Putinə 8 xal verib.

Almaniya kansleri Anqela Merkel təbii ki, almanca danışır. "Təmkinli, ancaq təsir baxımından zəif intonasiya ilə, özü də saitləri bir qədər uzadaraq", qəzet öz qənaətini belə açıqlayıb.

Məktəbdə xanım Merkel rus dilini öyrənməkdə parlaq nəticələr əldə edib. (Qeyd edək ki, o, sosialist Almaniyasında doğulub və Berlin divarları sökülənə qədər yaşayıb. E.H.) Qəzetin məlumatına görə Almaniya kansleri xüsusi həvəslə Putinlə rusca danışır. Rəsmi danışıqları isə onlar tərcüməçilər vasitəsi ilə həyata keçirirlər. "Çünki danışıqlar zamanı kiçik anlaşılmazlıqlar yarana bilər. Böyük müharibələrsə belə xırda şeylərdən başlanır", qəzet istehza ilə yazır. Qəzetin müşahidələrinə görə xanım Merkel də nadir hallarda kütlə qarşısında ingiliscə danışır. Ancaq onun ingiliscəsi kifayət qədər yüksək səviyyədədir.

Angela Merkel

"The Guardian" Almaniya kanslerinə 7 bal verib.

Fransa Prezidenti Fransua Olland isə Fransanın aşırı dərəcədə təhsil almış şəxslərindən biridir. Şəxsi həyatında ciddi ziddiyyətlər olan bu şəxsin ingiliscəsi də yüksək səviyədədir. Həmin səviyyə ona iş zamanı gərək olur, ancaq Fransa prezidenti ingilis dilində kəskin fransız ləhcəsində danışır.

Fransua Olland

"The Guardian" Fransa prezidentinə 10 ballıq sistem üzrə sadəcə 4 xal verib.

Böyük Britaniyanın Baş naziri Devid Kemeron isə ingilis dilində kübar üslubda danışır. Leyboristlərin lider Ed Milibend isə sadə xalqın içindən çıxmış birisi kimi ingils dilində danışmağa üstünlük verir. Baş nazirin birinci müavini Nik Kleqq əcnəbi kübarlardandır, ancaq ingilis dilində orta sinfə aid olan insanlar kimi danışır.

Cənab Kleqqin anası hollandiyalıdır, atası isə ispandır. O, dörd əcnəbi dildə danışır. Cənab Kemeron isə orta məktəbdə fransız dilini öyrənib, ancaq fransız dilindən heç vaxt istifadə etməyib. Cənab Milibend isə bəyan edib ki, Britaniya sakinləri ingiliscə danışmalıdır. Əlbəttə, onu başa düşmək olar. Axı o, ingilis dilindən başqa bir dil bilmir...