Sentyabrın 16-da Milli Məclisin Sədri Oqtay Əsədov Azərbaycanda səfərdə olan Türkiyənin xarici işlər naziri Feridun Sinirlioğlunun başçılıq etdiyi nümayəndə heyəti ilə görüşdü.

Qonağı səmimi salamlayan Oqtay Əsədov son günlər Türkiyədə terror hücumları nəticəsində hərbçi və polislərin həlak olmasına görə başsağlığı verdi, yaralananlara şəfa dilədi. Bildirdi ki, Azərbaycan-Türkiyə münasibətləri ən yüksək səviyyədədir. İqtisadi münasibətlərdən danışan Milli Məclisin Sədri qeyd etdi ki, iki ölkə arasında ticarət dövriyyəsi milyardlarla ölçülür. Azərbaycanda 2400-ə yaxın Türkiyə şirkəti fəaliyyət göstərir. İki qardaş ölkə bir-birinin iqtisadiyyatına böyük həcmdə investisiyalar yatırır. Lakin son illərdə Türkiyə və Azərbaycanın daha da güclənməsi bəzi qüvvələri narahat edir və bizə qarşı çirkin kampaniyalar aparılır.

Görüşdə iki qardaş ölkə arasında əlaqələrin daha da inkişaf etdirilməsində və möhkəmlənməsində parlamentlərin rolundan, işçi qruplarının fəaliyyətindən, deputatlarımızın beynəlxalq təşkilatlarda xalqlarımız və dövlətlərimiz üçün mühüm əhəmiyyət kəsb edən məsələlərdə eyni mövqedən çıxış etmələrindən, Dağlıq Qarabağ problemindən söhbət açıldı.

Səmimi görüş üçün təşəkkürünü bildirən Türkiyənin xarici işlər naziri Feridun Sinirlioğlu ulu öndər Heydər Əliyevin “bir millət iki dövlət” kəlamını xatırlatdı. Qeyd etdi ki, bu gün ölkələrimiz beynəlxalq təşkilatlarda da bir-birinə dəstək olur, eyni mövqedən çıxış edirlər.

Dağlıq Qarabağ münaqişəsindən danışan Feridun Sinirlioğlu dedi ki, Türkiyə Azərbaycan torpaqlarının Ermənistanın işğalından azad olunması üçün bundan sonra da dəstəyini davam etdirəcək.

Söhbət zamanı tərəflər həm Türkiyədə, həm də Azərbaycanda noyabrın 1-də keçiriləcək parlament seçkilərinin uğurlu olacağına əminliklərini bildirdilər. Belə bir inam ifadə olundu ki, hər iki ölkə bir-birilərini dəstəkləyərək qarşılarına çıxacaq bütün problemləri birlikdə həll edəcəkdir.

Görüşdə Milli Məclis Aparatının rəhbəri Səfa Mirzəyev, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov, hər iki ölkənin səfirləri Alpər Coşqun, Faiq Bağırov və digər rəsmi şəxslər iştirak edirdilər.