Bu gün səhər saatlarında Bakı-Sumqayıt yolunda mikroavtobus dəhşətli qəza törədib.

Belə ki, idarəetməni itirən mikroavtobus sürücüsü nəqliyyat vasitəsini yolun kənarında quraşdırılan dəmir arakəsmələrə çırpıb. Nəticədə avtomobilin qarşısından keçən dəmir arakəsmə arxa hissəyə qədər sərnişinlərə ciddi xəsarət yetirib.

Bundan öncə də baş verən bir neçə qəzada bu cür hallar baş verib. Odur ki, yenidən həmin arakəsmələrin həyat üçün daha təhlükəli olması məsələsi gündəmə gəlib.

"Azəryolservis" ASC-nin Mətbuat xidmətinin rəhbəri Anar Nəcəfli AzVision.az-a açıqlamasında bildirib ki, dünya praktikasında yollarda dəmir arakəsmələrin istifadəsi qəbulediləndir.

Onun sözlərinə görə, həmin ölkələrdə sürücülər avtomobili nizam-intizamla idarə etdiyi üçün belə dəhşətli qəzalar az hallarda baş verir.

“Avropada sürücülər yol-hərəkəti qaydalarına riayət edir, hava şəraitini nəzərə alırlar. Təəssüflər olsun ki, bizdə yol-nəqliyyat hadisələri tez-tez baş verir. Bu gün qəza baş verən ərazidə də mikroavtobus təhlükəsizlik məqsədi üçün quraşdırılan dəmir hissələrə keçib. Bu cür qəzalar daha çox sürücülərin məsuliyyətsizliyindən baş verir”.



“Azəryolservis” ASC-nin rəsmisi bildirib ki, hazırda avtomobil yollarında dəmir arakəsmələrin beton arakəsmələrlə əvəzlənməsi istiqamətində iş aparılır: “Hazırda Bakı-Quba yolunda dəmir arakəsmələr yığışdırılır. Onların əvəzinə beton arakəsmələr quraşıdırlacaq. Dünyanın hər bir yerində dəmir arakəsmələrin qoyulması normal haldır. Sadəcə ölkəmizdə sürücülərin məsuliyyətsizliyindən bu cür hadisələr baş verir. Bu baxımdan məcburuq ki, həmin dəmir arakəsmələri beton arakəsmələrlə əvəz edək.

Beton arakəsmələrdə təkəri geri qaytaran hissə var və avtomobil hər hansı bir qəza hadisəsi törətdikdə beton arakəsməyə dəyərsə, daha az xəsarətlərlə xilas olmaq olar. Hazırda bu istiqamətdə işlər aparılır. Qeyd etdiyimiz ki, Bakı-Quba-Rusiya avtomobil yolunda təmir aparılan hissədən başlayaraq dəmir arakəsmələr beton arakəsmələrlə əvəzlənir”.



Anar Kəlbiyev