`Seçkiyə 6-7 min pul xərclədim...` – Deputatla müsahibə

`Seçkiyə 6-7 min pul xərclədim...` – Deputatla müsahibə
  19 Noyabr 2015    Oxunub:3770
“Müxalifətçiləri dostluğa qəbul etmirəm”
Ana Vətən Partiyasının sədri, deputat Fəzail Ağamalının AzVision.az-a müsahibəsi:

- Fəzail müəllim, Milli Məclisin yeni tərkibində siz də təmsil olunacaqsız. Seçki ilə bağlı fikirlərinizi bilmək istərdik. Marafon necə keçdi?

- Seçki marafonu gərgin, maraqlı və ciddi mübarizə şəraitində keçdi. Seçkinin bütün mərhələrində əvvəlki illərdəki təcrübəmizə söykənərək işimizi daha yüksək formada qurmağa çalışdıq. Komandam istər imzatoplama, istər təbliğat-təşviqat kampaniyasında, istər seçki günü işinin öhdəsindən layiqincə gələ bildi. Nəticədə digər deputatlığa namizədlər üzərində ciddi qələbə çaldıq.

- Seçki marafonu sizə neçəyə başa gəldi?

- Çox pul xərcləmədim. Pulum əsasən imzatoplama və təbliğat-təşviqat kampaniyasının təşkilinə xərclənib. Yəni, daha çox nəqliyyat və komandamın gündəlik xərclərinə pulum gedib. Ortalama 6-7 min manat pul xərclənib.

- Seçki sonrakı mühiti necə xarakterizə edərdiniz?

- Seçkinin gedişi və yekunları göstərdi ki, Azərbaycanda bütün siyasi partiyalar üçün eyni şərait yaradılmışdı və hər kəs öz imkanlarına, gücünə, cəmiyyətdə tutmuş olduğu mövqeyə və qazanmış olduğu nüfuza görə seçki prosesindən konkret nəticə ilə çıxıb. Konstruktiv müxalifətin seçkidəki qələbəsi gözlənilən idi. Çünki, xalq radikalizmə tamamilə “yox” deyir. Destruktiv müxalifət partiyalarının sədrlərinin radikal addımları xalq tərəfindən qəbul edilmir. Bundan sonra da onların seçki prosesində qələbə qazanması mümkün deyil. Mən, 2003-cü ildə prezident İlham Əliyevin birinci seçimindəki faktı xatırlamaq istəyirəm. O zaman Yexlaxın deputatı olaraq iki məntəqədə bülletenlərinin sayılması prosesini əvvəldən axıra qədər izlədim. Prosesdə mənimlə bərabər Müsavat partiyasının təmsilçiləri də iştirak edirdi. Nəticədə bəlli oldu ki, İlham Əliyev İsa Qəmbərə böyük üstünlüklə qalib gəlib. Bunu görən Müsavat Partiyasının nümayəndəsi bildirdi ki, onların hakimiyyətə gəlməsinin yeganə yolu silahlı üsyandan keçir. Bu onların baxışlarını ifadə edən etiraf idi. Həmin bu etiraf indidə öz qüvvəsini saxlayır.

- İsa Qəmbərin məğlubiyyəti ilə bağlı xatirənizi bölüşdünüz.Bu seçkidə də o biabırçı məğlubiyyətə uğradı. Sizcə, artıq siyasətdən getməyinin vaxtı çatmayıbmı?

- Hesab edirəm ki, siyasətçi üçün ən mühüm, üstün keyfiyyətlərdən biri öz imkanlarını düzgün ölçüb-biçməsi və zamanında siyasətdən getməyi bacarmasıdır. Əgər siyasətçi hər kəsin gözü qarşısında “sönmək”də davam edirsə və bunu etiraf etmirsə, artıq onun siyasətdə yeri yoxdur.

- Seçkilərin nəticəsi olaraq iki konstruktiv müxalifət partiyasının sədri deputat seçildi və digər ikisi isə deputat mandatını itirdi. Onları necə müqayisə edərdiniz?

- Mən onları müqayisə etmək istəməzdim. Hər kəsin cəmiyyətdə öz yeri var.

- Bir qədər öncə özünüz qeyd etdiniz ki, siyasətçi imkanlarını düzgün ölçüb-biçməyi bacarmalıdır. Sizcə İqbal Ağazadə və İlyas İsmayılov imkanlarını düzgün müəyyənləşdirə bilmədiyindən məğlub oldu?

- Ola bilər. Hətta ola bilər ki, məğlubiyyətlərinin digər səbəbləri də var. Cəmiyyət hər kəsi görür və ona qiymət verməyi bacarır. Ona görə də xalqın nəbzini tutmaq hər bir siyasətçi üçün çox önəmlidir. Bunu bacaran siyasətdə bu və ya digər şəkildə uğur qazana bilir. Bacarmayanın isə məğlubiyyəti qaçılmazdır. Milli Məclisə seçkilər xalqın iradəsindən keçir. Ona görə də xalqın iradəsindən keçən prosesdə iştirak edirsənsə, hökmən xalqın sosial sifarişlərini nəzərə almalısan. Bu olduqca vacibdir.

- Son zamanlar müxalifətin radikal qanadı dini inanclı insanlardan öz məqsədləri üçün istifadə etməyə çalışır. Xüsusən də radikal dini cərəyanların himayədarları kimi özlərini təqdim etməyə can atırlar. Bu barədə nə deyə bilərsiniz?

- Son vaxtlar dini faktordan istifadə etmə halı qabarıq şəkildə özünü göstərməkdədir. Dini baxışlarla ölkələri, cəmiyyətləri idarə etmək ənənəsi orta əsrlər dövrünə aiddir. Dünya dövlətləri özlərinin yeni inkişaf mərhələsinə qədəm qoyduqdan və dünyəvi dövlətə keçiddən sonra dinlə siyasət bir-birindən ayrılıb. Doğrudur, din bir çox hallarda siyasətə müdaxilə etmək istəsə də dünyəvi insanlar tərəfindən qarşısı alınıb. Lakin bu günki reallıqda təəssüf ki, din önə keçməyə başlayıb. İŞİD din pərdəsi altında dünyaya qan uddurur. Onlar da atmış olduğu hər bir addımı Allahın adı ilə bağlayırlar. Avropada islamafobiya tüğyan edir. Sanki sivilizasiyalararası bir qarşıdurma meydana gəlib. Bu çox təhlükəlidir.

Azərbaycanda isə dini radikalizm üçün münbit şərait yoxdur. Buna baxmayaraq xaricdə müəyyən dairələr Azərbaycanda da dini radikalizmin əmələ gəlməsinə böyük maraq göstərirlər. Ancaq, Azərbaycan dövləti atdığı addımlarla göstərir ki, buna imkan verməyəcək. Radikal müxalifət ölkədə dini radikalizmi inkişaf etdirməyə çalışsa belə heç nəyə nail ola bilməyəcək. Çünki xalqımız və dövlətimiz buna heç vaxt imkan verməyəcək.

- Radikal fikirlərin formalaşmasında sosial şəbəklər də xüsusi rola malikdir. Sizcə, sosial şəbəklərin nəzarətə götürülməsinin vaxtı çatmayıbmı?

- Sosial şəbəkələr vasitəsi ilə ərəb ölkələrində inqlablar təşkil olundu. Azərbaycanda da bir sıra hallarda belə təhlükəli aksiyalar keçirilib. Bu hadisələrdə sosial şəbəklər sanki bir lider rolunu oynayır, insanları ideya ətrafında toplayır, onları küçələrə çıxarır və sonda küçələrdən onları geri çəkə bilmir. Beləliklə xaos əmələ gəlir. Ona görə də sosial şəbəkələr üzərində ciddi nəzarət mexanizmi tapılmalıdır və hökmən tətbiq edilməlidir. Xalqlara qarşıdurma gətirən virusun qarşısı alınmalıdır. Bunun yayılmasına imkan verilməməlidir.

- Siz özünüz də sosial şəbəkələrdən istifadə edirsiniz. Hansı təhlükəli viruslarla qarşılaşırsız?

- Mən fəal sosial şəbəkə istifadəçisi deyiləm. Orada özümün yazılarımı, lazım bildiyim müraciətlərimi dostlarımla bölüşürəm. Dostluğa qəbul etməm üçün çoxsaylı müraciətlər var. Ancaq kimlə dost olacağıma seçim edirəm.

- Müxalifətçiləri dostluğunuza qəbul edirsinizmi?

- Müxalif adamlarla necə dost ola bilərəm? Dost o adamlarla olunur ki, baxışların üst-üstə düşsün.

- Son günlər ölkədə əsas gündəm mövzusu bir sıra nazir və yüksək vəzifəli şəxslərin tutduqları vəzifələrdən azad olunması, bəzilərinin həbs olunmasıdır. Bu məsələyə münasibətiniz necədir

- Ölkə başçsının iradəsi ilə milli təhlükəsizlik naziri Eldar Mahmudov və onunquldur komandasının törətmiş olduğu böyük bir cinayətin üstü açılıb. Bu əməllər sözün həqiqi mənasında sahibkarlığın inkişafına ciddi maneələr törədib. Təsəvvür olunmaz bir mənzərə ilə üz-üzə qalmışıq. Şəxsən mənim ağlıma gəlməzdi ki, ölkənin təhlükəsizliyinin qayğısına qalmalı olan insanlar öz səalhiyyətlərindən kənara çıxaraq, belə əməllərlə məşğul ola bilərlər. Onlar dövlətin, insanların maliyyə vəsaitlərini qəsb ediblər. Belə bir vəziyyətin olması təssüfedicidir. Ölkə başçısının iradəsi ilə bu cinayətlərin üstü açılıb, proses gedir. Hesab edirəm ki, hər kəs törətmiş olduğu cinayətin cəzasını alacaq.

- Bu yaxınlarda prezident İlham Əliyev Antalyada dünya liderlərinin sammitində iştirak etdi. Azərbaycanın G 20 sammitində iştirakı bizə nə verdi?

- Bu sammitdə Azərbaycanın iştirakı bizə verilən dəyərin ifadəsidir. Həmçinin Azərbaycanın inkişaf səviyyəsi, ölkə başçısının nüfuzu G 20 sammitində iştirakımıza haqq verirdi. Sammitdə ölkə başçısı terrorizmlə bağlı kəskin mövqeyinim ortaya qoydu və Azərbaycanın terrorizmə məruz qalan ilk ölkələrdən biri olduğunu faktlarla böyük dövlətlərin rəhbərlərinin diqqətinə çatdırdı. Hesab edirəm ki, belə yüksək tribunadan işğal olunmuş torpaqlarımızın azad olunması ilə bağlı ölkə başçısının dediyi fikirlərin son dərəcə siyasi və hüquqi əhəmiyyəti var. Biz torpaqlarımızı hərb yolu ilə azad edəndə “Böyük 20-lər”in Ermənistanın yanında olmağa heç bir arqumenti olmayacaq.

Elvin Abdulqədirov


Teqlər:  





Xəbər lenti