Azərbaycan avtomatik top istehsal edəcək
Nazir bildirib ki, hazırda alınan və quraşdırılmış texnoloji xətlərdə müxtəlif tipli iz buraxan gülləli patronların, müxtəlif mm-lik növ döyüş sursatları üçün partladıcıların, 6 növ kiçik və iri kalibrli lülələrin, 6 növ artilleriya və tank topları üçün mərmilərin, avtomatik topun istehsalının mənimsənilməsi işləri aparılır. Eyni zamanda utilizasiya mərkəzində quraşdırılan xüsusi avadanlıq və cihazlar vasitəsilə istifadəyə yararsız bütün növ döyüş sursatlarının utilizasiyası həyata keçirilir:
`Ötən müddətdə 18 min 200 ədəd müdafiə təyinatlı məmulatların təmiri işləri aparılıb, 7 milyon 188 min ədəd məmulatın isə utilizasiya işləri yerinə yetirilib. Nazirliyin fəaliyyəti dövründə tabeli müəssisələrdə 450 addan çox mülki və ikili təyinatlı məhsulların istehsalı mənimsənilib, mülki məhsulların yeni növlərinin yaradılması və istehsalı istiqamətində məqsədyönlü işlər davam etdirilir.
Görülən tədbirlər nəticəsində mülki məhsulların istehsal həcmi ildən-ilə artmaqdadır. Belə ki, 2006-cı illə müqayisədə 2015-ci ildə istehsal olunan mülki məhsulların həcmi 2,9 dəfə artıb. Bu ildə proqnoz tapşırığa 102,5 faiz əməl olunub`.