AzVision.az xəbər verir ki, qanun layihəsi barədə danşan deputat Vahid Əhmədov bildirib ki, qanun layihəsinin dili çox qəlizdir və heç nə başa düşmək olmur. Komitə üzvü qeyd edib ki, Milli Məclisin müvafiq şöbəsi ilə danışıb, iradlarını bildirib:

“Çünki bu qanun layihəsi həddindən artıq qəliz yazılıb, heç nə başa düşmək olmur. Bunu elə yazın ki, biz mütəxəssislər heç olmasa, başa düşək. Bu sənədin əslində əsas məqsədi daxili bazarı qorumaq, dempinqə məruz qalan məhsulların miqdarını azaltmaqdır. Mən soruşmaq istəyirəm, ümumiyyətlə, Azərbaycanın dempinqə məruz qalan məhsullarının miqdarı, məbləği nə qədərdir? Hər halda müvafiq qurumlarda bunu bilənlər var. Onlar bunu açıqlasınlar. Bəlkə heç dempinqə məruz qalan məhsullarımız yoxdur? O zaman bəlkə heç bu qanuna da ehtiyacımız yoxdur?”.

Milli Məclisin üzvü bildirib ki, Azərbaycan Ümumdünya Ticarət Təşkilatına (ÜTT) daxil olmağa hazırlaşır:

“O zaman bu qanun həmin təşkilatın tələblərinə uyğunlaşdırılmalıdır. Yoxsa, bizim üçün əlavə problemlər yarana bilər. Azərbaycan ümumiyyətlə, bu məsələ ilə bağlı gələcəkdə hansısa dövlətə öz tələblərini irəli sürəndə bunu çox ciddi şəkildə əsaslandırmalıdır yoxsa bizi məhkəməyə verə bilərlər. İndiki zamanda bunu ikinci oxunuşun müzakirəsinə çıxarmağın da tərəfdarı deyiləm. Plenar iclasın ikinci oxunuşunun müzakirəsinə kimi, bu sənədi əməlli-başlı təkmilləşdirmək lazımdır” - deyə V.Əhmədov vurğulayıb.

Deputat Əli Məsimli isə sənədin dilinin mürəkkəbliyini qeyd edib: "Əgər bu qanun iş adamları ilə dövlət orqanları arasında münasibətləri təmin edəcəksə, sadə və anlaşıqlı olmalıdır. Həmçinin, bu qanun yalnız bir nazirliyin hazırlayacağı sənəd deyil. Burada müxtəlif qurumlar birlikdə işləməlidir".

"Əgər qanun hazırkı formada qəbul olunarsa, Azərbaycanda sənaye və sahibkarlıq batacaq. Bu qanun paket formasında təqdim olunmalıdır. ÜTT-yə qoşulmaq üçün azad ticarət və dempinqin nisbəti düzgün götürülməlidir ki, gələcək işlərə mane olmasın. Azərbaycana gələn mallar inhisarçılıqda olub, artıq bu problem aradan qaldırılır. Əgər qanun bu şəkildə qəbul olunarsa, bundan sui-istifadələr ola bilər. İndiyədək mal gətirməyənlərdən başqa digər şəxslərin mal idxalına dempinq adı ilə qadağa qoyula bilər. Ona görə də qanun sadələşdirilməlidir", - deyə Ə.Məsimlinin qeyd edib.

O həmçinin bildirib ki, 30-cu maddədə qeyd olunur ki, tərəflər mübahisəli məsələ olduqda məhkəməyə müraciət etməlidir: "Mən isə təklif edirəm ki, bu qanundan sui-istifadəyə görə fiziki və ya hüquqi şəxslər inzibati və cinayət məsuliyyətinə cəlb olunsun".
Dövlət Gömrük Komitəsinin Baş İdarə rəisi Mirqasım Vahabov isə qeyd edib ki, 2012-ci ildən başlayaraq, bu qanun layihəsi üzərində iş gedir: "Amma hansı iş gedir?! Tək bir qurumla iş alınmaz. Burada nəyə istinad edilir? Azərbaycan Respublikasının Konstitusiyası, Gömrük Məcəlləsi, "Gömrük tarifləri haqqında" qanunun müddəalarına... Cənab prezident "Gömrük tarifi haqqında" qanunun tətbiqi barədə 2012-ci ildə imzaladığı fərmanda Nazirlər Kabinetinə "Gömrük tarifi haqqında" qanunun 6.5-ci maddəsinə uyğun olaraq xüsusi, andidepminq və kompensasiya rüsumlarının formalaşdırılması və tətbiqi qaydasını tənzimləyən müvafiq qanun layihəsini hazırlayıb ölkə başçısına təqdim etmək tapşırılıb.

2012-ci ildən başlayaraq, 2015-ci il də daxil olmaqla, komitə rəhbərliyi adından dəfələrlə rəylər yazılıb. Təkcə 2014-cü ildə 14 rəy yazmışıq. Bu rəy nəzərə alınmır. Səbəbi isə yoxdur. Bilirsiniz, dempinqli rüsumların tətbiqi bütün ölkələrdə var. Amma baxaq görək, bu məhsullar hansılardır? Bunun araşdırılması, mexanizmi necə aparılacaq? Mən illərlə sizinlə bərabər iqtisadiyyat blokuna daxil olan qanunların müzakirəsində iştirak etmişəm. Bu qanunu mən dəfələrlə oxumuşam. Bu qanun anlaşılan deyil. Çox qəliz yazılıb, təkrarlar çoxdur. Elə dövrdür ki, xarici iqtisadi fəaliyyət iştirakçıları, rezident və qeyri-rezidentlər Azərbaycan qanunvericiliyi ilə maraqlanır və öyrənmək istəyirlər. Rezident bu cür qanunları necə başa düşəcək? Digər dövlətin qanunu olduğu kimi tərcümə etmək olmaz. Bir-birini inkar edən məqamlar var. Qanunu biz başa düşmürüksə, Apellyasiya Şurasına müraciət edən sahibkarları necə başa salacağıq?"

M. Vahabov əlavə edib ki, yeni qanun layihəsində antidempinq tədbirləri ilə bağlı araşdırma orqanının fəaliyyəti konkret göstərilməyib.

İqtisadiyyat Nazirliyinin şöbə müdiri Bəxtiyar Alışov isə qeyd edib ki, qanun layihəsinin hazırlanarkən başqa dövlətin qanunvericiliyindən köçürülməyib. O, qanunun qəliz olmasını layihənin Ümumdünya Ticarət Təşkilatının 3 sazişə uyğunlaşdırılması ilə əlaqələndirib.

Müzakirələrdən sonra işçi qrupunun yaradılmasına qərar verilib və qanun layihəsinin parlamentin aprelin 15-də keçiriləcək plenar iclasında müzakirəyə çıxarılması tövsiyyə olunub.

Daha sonra bugünkü iclasın gündəliyində olan "Azərbaycan Hökuməti ilə Birləşmiş Ərəb Əmirlikləri Hökuməti arasında dəniz nəqliyyatı üzrə institutsional əməkdaşlığa dair" sazişin təsdiq edilməsi haqqında və "Sosial sığorta haqqında" qanuna dəyişiklik edilməsi barədə qanun layihələri plenar iclasa tövsiyyə olunub.

Anar Kəlbiyev
AzVision.az