Bu barədə Azvision.az -a Dövlət Turizm Agentliyinin mətbuat xidmətinin rəhbəri Kənan Quluzadə deyib. O bildirib ki, Azərbaycan stendinə, ümumilikdə Şuşaya, Qarabağa böyük maraq var.

“Sərgidə 2500 iştirakçı təmsil olunurdu, stendlərə baxmaq üçün 39 min insan gəlmişdi. Bundan öncəki sərgilərdə Ermənistan tərəfi öz stendində beynəlxalq sazişlərə zidd olaraq həmin dövrlərdə işğal etdikləri torpaqlarımızın turizm potensialını tanıtmağa cəhd göstərirdi, toponimləri dəyişirdilər. Uzun illər biz diaspora təşkilatları, diplomatik nümayəndəliklər, onların rəhbərləri ilə birgə təşkilatçılarla danışıqlar aparıb, onları ermənilərin stendlərindən çıxartdırırdıq. Amma birinci ildir ki, biz Şuşamızı özümüz Azərbaycan stendində nümayiş etdirdik”.



K.Quluzadə qeyd edib ki, yeni turizm destinasiyası sərgi iştirakçılarının marağına səbəb olub.
“Bundan öncə onlayn formatda keçirilən görüşlərdə biz bu marağı suallardan, istəklərdən hiss edirdik. Xarici tərəfdaşlarımız, gələcək əməkdaşlıq edəcəyimiz insanlar, sadə turistlər, avropalılar, Yaxın Şərq, postsovet məkanı ölkələrindən olan iştirakçılar tərəfindən stendimizə böyük maraq var idi. Qarabağı, Şuşanı görmək istəyənlər çoxdur. Bundan öncə Ermənistan hansısa cəhdlər edib, müəyyən dərəcədə insanları gətirə bilirdi. Gələnlərin çoxları da erməni diaporasının xaricdə yaşayan üzvləri idi. Artıq şanlı Qələbədən sonra turistlər tam leqal, qanuni olaraq bizim bölgəmizə təşrif buyurub, səfər edə biləcəklər. Sərhədlər açılandan sonra Azərbaycan turistləri qəbul edəcək. Təhlükəsizlik, infrastruktur məsələləri, əhalinin qayıdışı təmin ediləndən sonra Qarabağ regionunda turizm bərpa olunub, inkişaf etdiriləcək”.



K.Quluzadə onu da bildirib ki, artıq digər dövlət qurumları ilə birlikdə Qarabağın turizm inkişaf strategiyası hazırlanılır:

“Bununla bağlı müzakirələr davam edir. Qarabağın turizm potensialının inkişafı üçün iki yanaşma mövcuddur. Birinci yanaşma ərazilərin klastrlara bölünməsidir. Məsələn, Şuşanın, Kəlbəcərin, Ağdamın öz-özlüyündə turizm potensialının inkişafı nəzərdə tutulur. İkinci yanaşma tematik yanaşmadır ki, burada marşurutların qurulması, turizm məhsullarının yaradılması nəzərdə tutulur. Marşurutlar müxtəlif ola bilər. Qarabağ mədəniyyəti, muğamı, mətbəxi, Qarabağ xanları irsi, xalçalçılıq, alban irsi, ipək yolu, sağlamlıq, qış turizm marşurutları açıla bilər. Bunların hamısının üzərində iş gedir. Strategiya təsdiqlənəndən sonra bu barədə həm ölkəmizdə, həm də xaricdə daha geniş təqdimatlar edəcəyik”.

Aytən Zəhra
Azvision.az