Bu fikirləri ötən gün Müsavat Partiyasından xaric olunan və başqanlığa keçmiş namizəd Qubad İbadoğlu haqqında çıxarılan qərarı şərh edərkən deyib. Facebook sosial şəbəkəsində Divanın qərarı ilə bağlı fikirlərini paylaşan Q.İbadoğlu bildirib ki, Müsavat Partiyası Divanı vədinə xilaf çıxdı, müzakirələrin açıq şəkildə aparılmasına, videoçəkilişin reallaşdırılmasına əvvəcədən verdiyi razılığı son anda pozdu.

“Saxta rəhbərlik, qondarma Divan üzvləri xalqın, sıravi müsavatçıların 100 ildən çox tarixi olan bir partiyada qərarların necə avtoritar, necə ədalətsiz qəbul edildiyini görməsindən çəkinərək, saxta demokrat kimliklərinin aşkara çıxmasından, maskalarının cırılmasından qorxdular.

Bir neçə gün əvvəl sosial şəbəkə vasitəsilə bu idbar məhkəmənin üzvlərini və onların əlaltılarını kişi kimi mübarizə aparmağa çağırmışdım. Amma ki, nə fayda, onlarda olmayanı onlardan ummağa dəyməzmiş!

Mən xeyli əvvəldən bu sifarişin nominal başqanın yox, real başqanın verdiyini bilirdim. Bugün sadəcə, üstdən aldığı sifarişi icra etmək üçün toplaşan altdakılar götürdükləri öhdəliyi icra etdilər”.

Özünün, daha öncə isə başqan namizədlərindən digəri Səxavət Əlisoyun partiyadan xaric edilməsini repressiya kimi qiymətləndirən Qı.İbadoğlu vurğualyıb ki, bu repressiyaların davamı olacaq:

“Bugün Müsavat Partiyasında bir kabus dolaşmaqdadır. Bu kabusun adı avtoritarizmdir. Bu kabusun adı müstəqil fikirləşənin, düşündüyünü deyənin "dilini kəsmək siyasətidir". Bu kabusun adı Müsavatı manqurtlaşdırmaq cəhdidir”.

Başqanlığa keçmiş namizəd müsavatçılara müraciət də ünvanlayıb:

“Fədakar müsavatçı bacı və qardaşlarım!

Qətiyyən ruhdan düşməyin! Bu qondarma, qeyri-legitim rəhbərlik istədiyinə nail ola bilməyəcək. Bütün kabuslar kimi onların da küləklə sovrulacağı gün gələcək və o gün uzaqda deyil. Biz Məhəmməd Əmin Rəsulzadənin bu xalqa miras qoyduğu milli məfkurənin bir tayfanın, bir qrupun əlində oyuncağa çevrilməsinə imkan verməyəcəyik. İlan ulduz görməsə, ölməz, deyiblər atalarımız. Ulduzun görünməsinə, parlament seçkilərinə elə də çox qalmayıb!”

Fatimə Kərimli