Dəhşətli təyyarə qəzası - 36 meyit çıxarılıb (Yenilənib)
Pakistan ordusunun mətbuat xidmətinin yaydığı məlumatda bildirilir ki, hazırda xilasetmə əməliyyatı davam edir.
***
(19:42)
Pakistanda qəzaya uğramış təyyarənin qalıqları altından 21 meyit çıxarılıb.
TASS xəbər verir ki, xilasetmə əməliyyatı davam edir.
Qeyd edək ki, göyərtəsində 42 sərnişin və 5 ekipaj üzvü olan təyyarə Xeybər-Paxtunxva əyalətinin Çitral şəhərindən ölkə paytaxtı İslamabada doğru hərəkətdə olub. Sərnişinlərdən ikisi azyaşlıdır.
Onlar arasında Pakistanın məşhur müğənnisi Cüned Camşed və 3 əcnəbi də var.
***
(16:31)
Pakistan Hava Yollarına məxsus sərnişin təyyarəsi radarlardan itib.
AzVision.az xəbər verir ki, bu barədə yerli “Dawn” qəzeti məlumat yayıb. Qəzet yazır ki, təyyarə yerli vaxtla 15.30-da Çitral şəhərindən çıxıb və 16.40-da İslamabadda enməli idi.
“Daily Pakistan” isə şahidlərə istinadən xəbər verir ki, təyyarə qəzaya uğrayıb.
İddia edilir ki, təyyarə dağa çarpılıb. Nəşrin məlumatına görə, təyyarənin göyərtəsində 42 sərnişin və 5 ekipaj üzvü olub.
İlkin Nəcəfzadə
AzVision.az