Məşhur alim Stiven Hokinq vəfat edib - (VİDEO)

  14 Mart 2018    Oxunub : 7122
Məşhur alim Stiven Hokinq vəfat edib - (VİDEO)
Tanınmış astrofizik, britaniyalı alim Stiven Hokinq 76 yaşında dünyasını dəyişib.

AzVision.az "Guardian"-a istinadən xəbər verir ki, alim Kembricdə vəfat edib.
Lüsi, Robert və Tim atalarının ölümü ilə bağlı bəyanat yayıblar: “Biz sevimli atamızın bu gün səhər saatlarında vəfat etdiyinə görə üzgünük. O, böyük alim və qeyri-adi insan idi. Onun işləri və irsi hələ xeyli illər yaşayacaq. Onun cəsarəti, inadı və yumoru dünyada insanlara ilham verirdi”.



Nəzəriyyəçi – fizik Stiven Hokinq 10 milyon nüsxədə çap edilən “Zamanın qısa tarixi” kitabının müəllifidir.

Qeyd edək ki, Stiven Hokinq 1942-ci ildə Oksfordda anadan olub. 1962-ci ildə Oksford Universitetini bitirib və nəzəri fizika ilə məşğul olmağa başlayıb. Həmin dövrdə Hokinqdə sonralar iflicə səbəb olacaq Yan amiotrofik sklerozun ilkin əlamətləri özünü büruzə verib.

1965-ci ildə Ceyn Vayldla evlənib, bir qız və iki oğlu dünyaya gəlib. 1985-ci ildə boğazından keçirdiyi əməliyyatdan sonra danışıq qabiliyyətini itirib. Həmin dövrdən bəri fizik ətrafdakı insanlar ilə dostlarının ona bağışladığı əlil arabasına quraşdırılmış nitq sintezatoru vasitəsi ilə ünsiyyət saxlayıb.

Ağır xəstəliyə baxmayaraq, Hokinq aktiv həyat tərzi sürüb.

Eldar Tanrıverdiyev
AzVision.az

Teqlər: StivenHokinq