"Qəbələ"nin yeni baş məşqçisi məlum oldu

  30 May 2018    Oxunub : 971
"Qəbələ"nin yeni baş məşqçisi məlum oldu
"Qəbələ" futbol klubunun yeni baş məşqçisi müəyyənləşib. Ukraynalı Roman Qriqorçukun istefasından sonra boş qalan posta Sənan Qurbanov təyin edilib.
AzVision.az kluba istinadən xəbər verir ki, 38 yaşlı mütəxəssislə ikiillik müqavilə imzalanıb.

Futbolçu kimi "Qarabağ", "Dinamo", "Şəfa", "Saypa" (İran), "MKT-Araz", "Şahdağ", "Qəbələ", AZAL, ABN), MOİK və "Muğan" klublarında çıxış edən hücumçu Azərbaycanın həm gənclər, həm də əsas milli komandalarında forma geyinib. O, əsas yığmada 1 oyun keçirib. S.Qurbanov 2004-cü il martın 31-də Moldova ilə səfər matçında meydana çıxıb.

Mütəxəssis futbolçu karyerasını başa vurduqdan sonra məşqçi kimi fəaliyyətə başlayıb. O, 2012-ci ilin yayından baş məşqçi kimi təyinatınadək "Qəbələ"nin əsas komandasında yardımçı məşqçi kimi fəaliyyət göstərib. 2014-cü ilin dekabrında Dorinel Muntyanu ilə yollar ayrıldıqdan sonra Qurbanov "qırmızı-qaralar"ı baş məşqçi kimi Premyer Liqada 3 matça çıxarıb. Bu oyunlarda "Qəbələ" 1 qələbə qazanıb, 2 heç-heçə edib.

AzVision.az

Teqlər: Qəbələ   Klub