Müxalif Respublikaçılar partiyasının deputatı Taçat Vardapetyan yenə Paşinyanın Dağlıq Qarabağ münaqişəsinin nizamlanmasına dair tutarsız arqumentinə - Qarabağ separatçılarının danışıqlar prosesində tərəf kimi iştirakının vacibliyi barədə bəyanatına diqqət çəkərək bildirib ki, bu cür mövqeyinə görə rəsmi Bakı Ermənistanın baş nazirinin sülh yolu ilə nizamlanma prosesinə mane olduğunu deyib. Bu mənada sual olunub ki, belə vəziyyətdə Paşinyan danışıqlar prosesinin dalana dirənməsinin səbəbkarı ola bilər və bu barədə nə fikirlərşir? Lakin Paşinyanın cavabı əvvəlki destruktiv bəyanatlarından heç nə ilə fərqlənməyib.

“Bunu bilmək vacibdir ki, Dağlıq Qarabağ “xalqı” Ermənistan hakimiyyətinin formalaşmasında iştirak etmir. Və mən də “Dağlıq Qarabağ Respublikası”nın (erməni separatçılarının dünyanın heç bir ölkəsi tərəfindən tanınmayan qondarma qurumu – red) “prezidenti” və ya "baş naziri" olmadığıma görə onun adından danışıqlar aparmaq səlahiyyətim yoxdur. “Dağlıq Qarabağ Respublikası” danışıqlar prosesində ayrıca tərəf kimi çıxış etməlidir”, – deyə işğalçı ölkənin rəhbəri bəyan edib.

Sərsəm bəyanatla kifayətlənməyən Paşinyan, münaqişənin indiyədək həllini tapmamasında növbəti dəfə Azərbaycanı günahlandırıb. Bununla belə, işğalçı ölkə rəhbəri Ermənistanı sülhpərvər imicdə göstərmək üçün Dağlıq Qarabağ münaqişəsinin nizamlanması üzrə danışıqlar prosesini davam etdirməyə hazır olduqlarını bildirib.

Xatırladaq ki, rəsmi Bakı Azərbaycanın işğal edilmiş rayonlarının guya qondarma “Dağlıq Qarabağ Respublikası”nın tərkib hissəsi olması barədə Ermənistan rəhbərliyinin bəyanatlarını qətiyyətlə rədd edib və ATƏT-i bu təhlükəli bəyanatlara reaksiya verməyə çağırıb. Azərbaycan rəhbərliyi Paşinyanın bu cür bəyanatlarının hər vasitə ilə danışıqlar prosesini pozmağa yönəldiyini və belə olan təqdirdə, bunun bütün məsuliyyətinin Ermənistan tərəfinin və şəxsən Paşinyanın üzərinə düşəcəyini bəyan edib.

Leyla Elbrusqızı
AzVision.az