Azvision.az xəbər verir ki, bu barədə “Associated Press” beynəlxalq informasiya agentliyi məlumat yayıb.

Krallıq məhkəməsi bildirib ki, Səudiyyə hökuməti pul vəsaitləri formasında aktivlər, əmlak və biznes-aktivlərini əldə edib və bununla da anti-korrupsiya komitəsinin işi yekunlaşıb. Kampaniyanın gedişində 381 nəfər dindirilib, onlardan 87-si işin məhkəməsiz həllinə razılaşıb. 56 nəfərə qarşı isə cinayət işi açılıb. Məhkəməsiz həll variantından imtina edən 8 nəfərə qarşı isə korrupsiya ittihamı irəli sürüləcək. İttiham irəli sürülmədiyi digər saxlanılanlar isə sərbəst buraxılıb.

Qeyd edək ki, 2017-ci ilin noyabrında Səudiyyə Ərəbistanının vəliəhd şahzadəsi Məhəmməd bin Salman tərəfindən başladılan anti-korrupsiya kampaniyası çərvivəsində Səudiyyənin 11 şahzadəsi, yüzlərlə keçmiş məmur və biznesmenlər həbs edilmişdi. Onlar bir neçə həftə dəbdəbəli “Ritz-Carlton” otelində təcrid vəziyyətində saxlanıldıqdan sonra həbsxanaya salınmışdılar.

Ekspertlər isə bildirirlər ki, vəliəhd şahzadənin təşəbbüs göstərdiyi bu kampaniyanın adı “anti-korrupsiya” olsa da, əslində məqsəd kral ailəsinin zəngin üzvləri və biznesmenləri hədələyərək, onları Ər-Riyadın ABŞ-dan almağa söz verdiyi 400 milyard dollarlıq silahın ödənişində iştiraka məcbur etmək və bundan imtina etdikləri təqdirdə isə həbsxanaya salaraq varidatlarına əl qoymaq idi.

Leyla Elbrusqızı
Azvision.az