General Vladimir Zaman dövlətə xəyanətə görə həbs edildi

  25 Fevral 2019    Oxunub : 1729
General Vladimir Zaman dövlətə xəyanətə görə həbs edildi
Ukrayna Hərbi Prokurorluğu Silahlı Qüvvələrin baş qərargahının keçmiş rəisi, general-polkovnik Vladimir Zamanı dövlətə xəyanətdə şübhəli bilərək həbs edib.

Azvision.az xəbər verir ki, bu barədə “Ukrayna milli xəbərləri” informasiya agentliyi ölkənin güc strukturlarındakı mənbələrinə istinadən məlumat yayıb.
Bildirilib ki, Vladimir Zaman bu gün səhər saatlarında Hərbi Prokurorluq və Ukrayna Təhlükəsizlik Xidmətinin birgə səyləri nəticəsində saxlanılıb. Lakin ona qarşı irəli sürülən ittihamların mahiyyəti barədə tam məlumat yoxdur.

Xatrladaq ki, Kiyevdəki 2014-cü ilin Maydan hadisələri fonunda o zaman Ukrayna Silahlı Qüvvələrinin baş qərargah rəisi olan Vladimir Zaman tutduğu vəzifədən istefa vermişdi. Həmçinin, onun müavini Yuri Dumanski də istefaya çıxmışdı. Dumanski bu qərarını ölkədə baş verən vətəndaş müharibəsinə hərbçilərin cəlb edilməsi cəhdlərinin olması ilə əlaqələndirmişdi. “Bu, yolverilməzdir və çox sayda mülki və hərbi şəxslərin ölümü ilə nəticələnə bilər”, deyə bildirmişdi. Lakin həmin vaxt Ukrayna Müdafiə Nazirliyi baş qərargah rəisi ilə onun müavinini Ukrayna Silahlı Qüvvələri hərbçilərini təyinatları üzrə tapşırıqlarının dəqiq icrasından yayındırmaqda ittiham etmişdi.

Leyla Elbrusqızı
Azvision.az

Teqlər: Ukrayna   Maydan