Paşinyan nazirlərin Moskva görüşünü şərh etdi

  15 Aprel 2019    Oxunub : 2915
 Paşinyan nazirlərin Moskva görüşünü şərh etdi
Ermənistanın baş naziri Nikol Paşinyan Ermənistan və Azərbaycan xarici işlər nazirləri Zohrab Mnatsakanyanla Elmar Məmmədyarov arasında keçirilən bugünkü Moskva görüşündən gözləntilərini dilə gətirib.
Azvision.az -ın erməni KİV-nə istinadən verdiyi məlumata görə, Paşinyan bununla bağlı jurnalistlərə açıqlama verib. O, ümid edir ki, nazirlər onun və Azərbaycan prezidentinin tapşırıqlarını icra ediblər.

“Bu tapşırıqlar bizim Vyanadakı müzakirələrimizin əhatə dairəsilə, gündəliyin müzakirəsilə - mövqelərin yaxınlaşdırılmasına cəhdlə bağlıdır”, – deyə Ermənistanın baş naziri vurğulayıb.

Paşinyan, həmçinin Mnatsakanyanla Məmmədyarovun görüşündə Rusiya XİN rəhbəri Sergey Lavrovun da iştirak etməsində heç bir qəribəlik görmədiyini deyib: “Burada təəccüblü heç nə yoxdur. Rusiya ATƏT-in Minsk qrupunun 3 həmsədr ölkəsindən biridir. Bu cür təcrübə əvvəllər də olub. Rusiya, Fransa və ya ABŞ xarici işlər nazirlərinin himayəsi altında belə görüşlər keçirilə bilər”.

Xatıladaq ki, bu gün Moskvada Azərbaycanın xarici işlər naziri Elmar Məmmədyarovla Ermənistanın XİN rəhbəri Zohrab Mnatsakanyan arasında görüş keçirilib. Görüşdə Minsk qrupunun həmsədr ölkəsinin xarici işlər naziri kimi Rusiya XİN başçısı Sergey Lavrov da iştirak edib. Daha sonra Minsk qrupunun həmsədrləri Dağlıq Qarabağ probleminin həlli istiqamətində nazirlərin üçtərəfli danışıqlarına qatılıblar.

Leyla Elbrusqızı
Azvision.az

Teqlər: Azərbaycan   Ermənistan   DağlıqQarabağ   Rusiya   Minskqrupu